Шимолий Корея 2021 йилда Токиода бўлиб ўтадиган ёзги Олимпия ўйинларида иштирок этмайди. Бу ҳақда Yonhap ва Nknews нашрларига таяниб, «РБК» хабар берди.
«Қўмита аъзоларининг спортчиларимизни хавфли юқумли касалликлар сабабли юзага келган глобал фавқулодда вазиятлардан ҳимоя қилиш масаласидаги таклифидан сўнг, Шимолий Корея Олимпия қўмитаси муҳокамалар ўтказди ва ХХХИИ ёзги Олимпия ўйинларида қатнашмасликка қарор қилди», — дейилади Nknews нашри тақдим этган Шимолий Корея ҳукуматининг хабарида.
Нашрнинг ёзишича, Пхеньяннинг Олимпиадада қатнашмаслик қарори шуни англатадики, 2018 йилнинг бошида Пхёнчхан қишки Олимпия ўйинларида бўлгани каби энди Сеулда КХДР билан музокараларни фаоллаштириш учун спорт мусобақаларидан фойдаланиш имконияти бўлмайди.
Токио Олимпиадаси 2020 йилнинг 24 июлидан 9 августигача ўтказилиши керак эди, лекин коронавирус пандемияси сабабли ўйинлар бир йилга кечиктирилди. Мусобақа ташкилотчилари Олимпия ўйинларини томошабинларсиз ўтказишга қарор қилди. Токио бу қарорнинг пандемия шароитида мусобақалар хавфсизлигини таъминлаш зарурати билан боғлиқлигини таъкидлади.
Паралимпия ўйинлари эса 24 августдан 5 сентябргача бўлиб ўтади.
Аввалроқ Япония компанияларининг 56 фоизи 2021 йил Токиода бўлиб ўтадиган Олимпиада ўйинларига қарши чиққани ҳақида хабар берилган эди. Таъкидланишича, 2020 йил август ойидаги сўров натижаларига нисбатан норозилар сони 3 фоизга кўпайган.
Изоҳ (0)