Қозоғистонда 2021 йил сентябрь ойига келиб коронавирусга қарши вакцинага муҳтож 10 миллион кишини эмлаш режалаштирилган. Бу ҳақда мамлакат бош вазири Асқар Маминга таяниб, Tengrinews хабар берди.
Бош вазирнинг таъкидлашича, апрель, май ва июнь ойларида, ҳар ойда 2 миллиондан жами 6 миллион киши коронавирусга қарши вакцина олади.
«Сентябрь ойида биз вакцинага муҳтож бўлган 10 миллион кишини эмлаб бўлишни режалаштирмоқдамиз. Шундан сўнг орттириладиган жамоавий иммунитет таъсирини кутамиз», — деди Мамин ҳукумат йиғилишида.
«Шу билан бирга, айрим соҳаларда вакцинация ишларини кучайтириш зарур. Соғлиқни сақлаш вазирлиги ва ҳокимиятларга эмланганлар сонини кўпайтириш ва ҳудудларга белгиланган режага мувофиқ вакциналар етказиб беришни таъминлаш бўйича чоралар кўришни топшираман. Ахборот ва ижтимоий тараққиёт вазирлиги медиарежани янгилаб, Соғлиқни сақлаш вазирлиги ҳокимиятлар билан биргаликда эмлашнинг аҳамияти тўғрисида жамоатчиликка кенг кўламли маълумот ва тушунтириш ишларини олиб бориши лозим», — дея кўрсатмалар берди бош вазир.
Соғлиқни сақлаш вазири Алексей Цой апрель ойида мамлакат ҳудудларига коронавирусга қарши вакциналар етказиб беришнинг кўпайтирилиши ҳақида маълум қилган эди.
Аввалроқ Қозоғистонда мактаб ўқувчилари орасида коронавирусга чалиниш даражаси март ойида 5 фоизга ошгани ҳақида хабар берилганди.
Шунингдек, Қозоғистон пойтахти Нур-Султонда коронавирус билан касалланиш ҳолатлари ортгани сабабли 30 мартдан янги карантин чекловлари амал қилишни бошлади. Бошқа чора-тадбирлар билан бир қаторда, пойтахтдаги мактаб битирувчиларидан ташқари бошқа ўқувчилар ва олий ўқув юртлари талабалари масофавий таълимга ўтказилди.
Мавзуга доир:
Изоҳ (0)