Салоҳ Бенземага, Клопп эса яна Зиданга қарши. Ҳаммаси титанлар жанги — «Реал» ва «Ливерпуль» тўқнашуви ҳақида

Европа футболида яна бир мавсум ўзининг ҳал қилувчи палласига кириб бормоқда. Хусусан, қитъанинг энг нуфузли мусобақаси — Чемпионлар Лигасида 6 апрель, чоршанба куни 1/4 финалнинг илк баҳсларига старт берилади. Кўзи кўр дея таърифланадиган қуръа мазкур босқичда мусобақанинг 2018 йилдаги финалчилари — «Реал Мадрид» ва «Ливерпуль»ни яна бир-бирига қарши қўйди. Аммо эски танишлар 3 йил олдинги бўлгани каби бош соврин учун битта ўйин эмас, балки ярим финал йўлланмаси учун иккита баҳсдан иборат «жанг»да қатнашади. Ҳозир 3 йил олдинги «Реал» ҳам, 3 йил олдинги (ёинки 1 йил олдинги) «Ливерпуль» ҳам йўқ. Қуйида жамоаларнинг бугунги баҳсга қай ҳолда етиб келгани ва уларнинг имкониятлари ҳақида ҳикоя қилинади.

Мусобақа йўли

«Ливерпуль» Мадрид жамоасига қараганда гуруҳ босқичини бир мунча осон тарзда ўтказди. Мерсисайд жамоаси гуруҳда «Аталанта», «Аякс», «Мидтюлланд» билан курашиб, 1-поғона билан нимчорак финалга чиқди. У ерда эса мерсисайдликлар «Лейпциг»га рўбарў келди. Юрген Клопп жамоаси «буқалар»ни иккала ўйинда ҳам бир хил — 2:0 ҳисобида мағлуб этган ҳолда навбатдаги босқич йўлланмасини қўлга киритди.

Асосий воқеликлар

1. Узоқ кутилган Серхио Рамос ва Муҳаммад Салоҳ ўртасидаги дуэл бўлмайди. 1/4 финали қуръасидан сўнг кўплар тилидан Рамос ва Салоҳ тушмай қолди. ОАВ ҳам Чемпионлар Лигаси 2017/18 йилги мавсуми финалида бўлган воқеани эсга сола бошлади. 3 йил олдинги финал баҳсида Салоҳ Рамос билан курашдан сўнг елкасини жароҳатлаб олган ва ўйинни охиригача давом эттира олмаганди. Кейин эса «Ливерпуль» ўйинни бой бергани мухлислар ёдидан кўтарилмаган бўлса керак. Ўшанда футбол мухлисларининг фикри икки қутбга бўлинганди: бир томон Рамос—Салоҳ тўқнашувини ўйинда бўлиб турадиган ҳолат сифатида баҳолаган бўлса, иккинчи томон Рамос Салоҳни атайлаб сафдан чиқарди деган фикрда эди.

Ўйиндан олдин журналистлар ҳатто Муҳаммад Салоҳни ушбу ҳолат бўйича саволга тутишга ҳам улгурди. Мисрлик футболчи эса тўқнашув тарихда қолганини, ҳозирда фақат янги ўйин ҳақида ўйлаётганини билдириб «қасос» ҳақидаги фикрларни бир четга суриб қўйди. Рамоснинг жароҳати эса бу дуэл борасидаги гап-сўзларга умуман нуқта қўйди.

2. Эден Азар яна «Реал»га ёрдам бера олмайди. Бельгиялик футболчи Мадридда иккинчи йилини ўтказмоқда. Бироқ «қаймоқранглилар»нинг мухлислари кўз ўнгида Азар деганда голли узатма, голлар, алдамчи ҳаракатлар эмас, балки фақат жароҳатланган футболчи намоён бўлмоқда. 30 ёшли Эден 2020/21 йилги мавсум «Реал» сафида атиги 14 та ўйинда қатнашди. Зидан Азарни асосий таркиб ўйинчиси сифатида кўришни истаганди, бироқ француз мутахассисининг истаги аллақачон амалга ошмас орзудек кўринмоқда. Азарнинг «Ливерпуль»га қарши баҳсдан олдин жароҳатидан фориғ бўлиб сафга қайтгани, жамоа билан гуруҳ машғулотларида иштирок этгани айтилганди. Бироқ шифокорлар унинг соғлиғи билан таваккал қилмаган маъқул деган қарорга келди ва Азар «Реал»нинг «Ливерпуль»га қарши ўйин қайдномасидан ўрин олмади. Қайд этиш жоиз, Эден фаолияти давомида «Ливерпуль»га қарши 18 марта ўйнаган ва унинг статистикаси қуйидагича: 7 та гол, 2 та ассист.

3. Бензема қойилмақом ҳолатга кириб улгурди. Иккинчи мавсумдирки «Реал»да том маънодаги янги жамоа қурилиши давом этмоқда. Аммо жамоа етакчилари ҳамон ўша яқин ўтмишдагилардир. Хусусан, ҳимоядаги энг ишончли вакил — Серхио Рамос, марказда ўша учбурчак, яъни Модрич, Кроос, Каземиро триоси. Ҳужумда эса 33 ёшга кирганига қарамай фаоллик ва сермаҳсуллик намойиш этаётган Карим Бензема. 2020/21 йилги мавсумда Бензема 33 та ўйинда 24 та гол уришга эришди ва мадридликларнинг энг яхши тўпурари бўлиб турибди. Футболчи Ла Лигада ойнинг энг яхши ўйинчиси бўлди. У ортда қолган ойда 3 та ўйинда 5 та гол урди. Франциялик футболчини шунчаки тўхтатиб бўлмаяпти. Карим кетма-кет 7 та ўйинда гол урди.

4. Рафаэл Варан ўйинда иштирок этмайди. Франциялик ҳимоячида коронавирус аниқланди. Зинедин Зидан жамоанинг Рамосдан кейин иккинчи ўринда турадиган энг ишончли ҳимоя вакилидан ҳам айрилди. Зизу энди ҳимоя марказини ҳамон ишончни оқламаган Эдер Милитао ва ҳар доим ҳар ерда ўйнашга тайёр бўлган Начо Фернандес тандемига топширишга мажбур.

«Ливерпуль»

1. «Қизиллар» ўзига келмоқдами? Ортда қолган ҳафтада Юрген Клопп жамоаси «Эмирейтс» стадионида «Арсенал»ни 3:0 ҳисобида тиз чўктирди. Ҳисоб-ку ўз йўлига, аммо «Ливерпуль»нинг мазкур баҳсдаги ўйини унинг аввалги икки мавсумдаги ёрқин ҳаракатларини эслатиб юборгани ҳам рост. «Тўпчилар» устидан қозонилган муваффақият, «Ливерпуль» учун кетма-кет 3-қуруқ ғалаба бўлди. Мерсисайдликлар 2020 йил ёзидан бери кетма-кет 3 та ўйинда ўз дарвозасидан гол ўтказмаган ҳолда ғалаба қозонмаган эди. Тўғри, бу ғалабалар орасида ФИФА кунлари ҳам бор. Аммо барибир бундай серия жамоанинг ўйинида сезиларли даражада олдинга силжиш бўлганлигини ҳам кўрсатади. Сўнгги вақтларда Трент Александер-Арнольднинг самарадорлиги тушиб кетгани айтилди. Бунинг ортидан Гарет Саутгейт футболчини ФИФА кунларида Англия миллий терма жамоасига ҳам жалб этмади. Бунга жавобан Трент «Арсенал»га қарши қойилмақом ўйин ўтказди. 22 ёшли Трент мазкур баҳсдаги голли узатмаси орқали Майкл Оуэн, Робби Фаулер каби юлдуз футболчиларнинг «Ливерпуль»да қайд этган натижасини такрорлади. Гап шундаки, энди мазкур учала футболчининг ҳисобида 30 тадан голли узатма бор. Фарқ шуки, Оуэн бу натижага эришиш учун 216 та, Фаулер эса 266 та ўйинда иштирок этган. Александер-Арнольдга эса 121 та ўйин кифоя қилди. Бир сўз билан айтганда Трент яна трендда!

2. Диогу Жота ҳам катта футболни соғиниб қолди. Португалиялик ҳужумчи 3 ой давомида жароҳатини даволатди. Ва сафга қайтиши билан қисқа фурсатда ўзининг оптимал формасини ҳам тиклаб олди. Жота сафга қайтгач собиқ жамоаси «Вулверҳэмптон»га қарши баҳсда «Ливерпуль»нинг ягона ғалаба голига муаллифлик қилди. Кейин эса Португалия терма жамоаси ихтиёрига бориб қўшилди. ЖЧ—2022 саралаши доирасида Сербияга қарши баҳсда дублга эришди. Энг қизиғи, 178 сантиметр бўйга эга футболчи иккала голини ҳам боши билан урди. 24 ёшли Жота «Арсенал»га қарши баҳсда ҳам ўта фаол ва самарали ўйнади. Унинг ўйиндаги ҳисобни очувчи голига эса айнан тепадаги қаҳрамон Трент ассистентлик қилди. Ўйинга якуний нуқтани ҳам Жотанинг ўзи қўйди.

Тахминий таркиблар

Ўйинни аниқ ўтказиб юборадиган футболчилар

• «Ливерпуль»нинг Чемпионлар Лигасидаги сўнгги 12 та ўйинидан 11 тасида 3 тадан кам гол урилган.
• «Ливерпуль» Чемпионлар Лигасидаги сўнгги 9 та ўйиндан 7 тасида гол ўтказмади.
• «Реал» Чемпионлар Лигасидаги сўнгги 6 та ўйиндан 5 тасидан ғалаба қозонди.
• «Реал»—«Ливерпуль» қарама-қаршилигидаги сўнгги 3 та ўйинда мадридликлар ғалаба қозонган.

Мураббийлар фикри:

Бу жон сақлаш учун кечадиган баҳс бўлиб, 180 дақиқа ёки ундан ҳам кўпроқ давом этиши мумкин. Биз нимани кутишни биламиз, лекин ҳозир фақат бўлажак баҳсга эътибор қаратамиз, бошқа нарсага эмас. Бу мавсумнинг энг муҳим ўйинидир. Олдинги йилдаги финални эсламаймиз.

«Ливерпуль» — бенуқсон жамоа. У жуда кучли ҳужумга эга ва умуман олганда, уни қийин рақиб дейиш мумкин. «Ливерпуль» яхши жамоавий футбол намойиш этмоқда. Ҳар иккала томонда ҳам жароҳатланган ўйинчилар бор, аммо бу футболнинг бир қисмидир. Куч жамоавий ўйиндан келиб чиқади.

Зинедин Зидан, «Реал» бош мураббийи

Бу жуда ҳаяжонли. Жуда мураккаб қуръа бўлди, аммо мени барча нарса қониқтирмоқда. Чунки бошқа жамоалар ҳам жуда кучли.

Ушбу учрашувларни чиндан ҳам интиқлик билан кутяпман. Сўнгги учрашганимиздан атиги икки йил ўтди ва бу биз учун қийин кеча бўлганди, шунинг учун уларга қарши яна майдонга чиқиш имкониятини қўлга киритиш — жуда зўр.

Юрген Клопп, «Ливерпуль» бош мураббийи