ОКМК футбол клуби бош мураббийи Миржалол Қосимов Осиё Чемпионлар Лигаси плей-офф босқичи доирасида «Ал-Ғарафа»га қарши кечадиган баҳс олдидан ўз фикрлари билан ўртоқлашди. Бу ҳақда ОКМК матбуот хизмати хабар қилмоқда.
ОКМК жамоасининг мақсади халқаро мусобақаларда иштирок этиш. Клуб инфратузилмаси ҳам охирги йилларда айнан шу мақсадга эришиш учун йўналтирилган. Қолаверса, Ўзбекистонда футболни жуда ҳам қаттиқ яхши кўришади ва мамлакатимизда футбол ишқибозлари жуда ҳам кўп. ОКМК Олмалиқ шаҳридаги жамоамизнинг ашаддий мухлислари учун ҳам борини бериб ҳаракат қилади. Шунингдек, халқаро майдондаги иштирок пайти Ўзбекистондаги барча ишқибозлар ҳам бизга бефарқ бўлмайди, деб ўйлайман.«Ал-Ғарафа» — ОКМК учрашуви 7 апрель куни Тошкент вақти билан 20:20 да бошланади. Ушбу учрашув ғолиби Чемпионлар Лигаси гуруҳ босқичига йўлланма олади.Қатарга яхши ниятлар билан келганмиз. «Ал-Ғарафа» — яхши жамоа. Рақибни ўрганиб чиқдик. Гарчи «Ал-Ғарафа» ички чемпионатида яхши иштирок этолмаётган бўлса-да, жиддий рақиб. Кучли мутахассис қўл остида юқори малакали футболчилар йиғилган. Қолаверса, легионерлари, хусусан, Ку Жа Чол, Гедейра, Ҳанни ва Морено каби индивидуал кучли ижрочилар мавжуд.
Рақибнинг ўйинлари видеотасвирини кўриб чиқдик. Биз авваламбор ўз ўйинимиздан келиб чиқиб ҳаракатланамиз. Бу гуруҳ босқичи эмас, балки, бир ўйиндан иборат баҳс. Қийин тарафи шу. Бу нафақат биз учун, балки, «Ал-Ғарафа» учун ҳам кичик муаммо. Бу футбол. Нима бўлишини ўйинда кўрамиз.
Энг муҳими ўйинга жиддий тайёргарлик кўряпмиз. Футболчиларимиз ўйиннинг қиймати нақадар юқори эканлигини яхши ҳис этиб турибди. Биз нафақат жамоамиз шаъни, балки, ўзбек клубларининг халқаро майдондаги аввалги мавқейини қайтариш учун ҳам курашамиз. Чунки охирги йилларда ОФКда рейтингимиз тушиб кетган. Авваллари учта ўзбек клуби гуруҳ босқичидан иштирок этарди. Ҳозир эса бу кўрсаткич «1+1»га айланган.
Ҳали таъкидлаганимдек, бу баҳс бир учрашувдан иборат. Шу боисдан ҳам бўлажак беллашувда имкон қадар камроқ хато қилиб, юзага келадиган вазиятлардан максимал фойдаланишимиз зарур.
«Ал-Ғарафа»ни кучли ва кучсиз жиҳатлари ҳақида
Биринчидан, ҳамма нарсани ўйин кўрсатади. Ҳозирдан рақиб ҳақида батафсил таъриф беришни истамасдим.
Қўшимчасига, менда рақибнинг камчиликларини санаш ва ёмонлаш одати йўқ. Доим асосий урғуни ўз жамоамга қаратаман ва рақибга омма олдида кескин баҳони бермайман. Шуниси аниқки, биз рақибдан қўрқмаймиз. Лекин «Ал-Ғарафа» ҳурматга сазовор жамоа. Тўп билан ҳам яхши муомалада бўладиган жамоа сифатида биламан.
Менимча, мухлисларни жуда ҳам қизиқарли ўйин кутмоқда. «Ал-Ғарафа»да ҳам, бизда ҳам тўп билан кўпроқ муомалада бўлиш талаби бор. Шундай ўйин тарафдоримиз. Майдонда рақибга ҳеч бир чизиқда бўшлиқ қолдирмаслик талаб этилади. Рақибни хато қилишга мажбурлаб, ўзимиз камроқ хато қилишимиз зарур бўлади.
Миржалол Қосимов, ОКМК бош мураббийи
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)