Saloh Benzemaga, Klopp esa yana Zidanga qarshi. Hammasi titanlar jangi — “Real” va “Liverpul” to‘qnashuvi haqida

Yevropa futbolida yana bir mavsum o‘zining hal qiluvchi pallasiga kirib bormoqda. Xususan, qit’aning eng nufuzli musobaqasi — Chempionlar Ligasida 6-aprel, chorshanba kuni 1/4 finalning ilk bahslariga start beriladi. Ko‘zi ko‘r deya ta’riflanadigan qur’a mazkur bosqichda musobaqaning 2018-yildagi finalchilari — “Real Madrid” va “Liverpul”ni yana bir-biriga qarshi qo‘ydi. Ammo eski tanishlar 3 yil oldingi bo‘lgani kabi bosh sovrin uchun bitta o‘yin emas, balki yarim final yo‘llanmasi uchun ikkita bahsdan iborat “jang”da qatnashadi. Hozir 3 yil oldingi “Real” ham, 3 yil oldingi (yoinki 1 yil oldingi) “Liverpul” ham yo‘q. Quyida jamoalarning bugungi bahsga qay holda yetib kelgani va ularning imkoniyatlari haqida hikoya qilinadi.

Musobaqa yo‘li

“Real” guruh bosqichidan chiqish uchun “Borussiya M”, “Shaxtyor D” va “Inter M” bilan kurash olib bordi. Madridliklar bu kurashda qiyinchilik bilan bo‘lsa ham g‘olib chiqdi va pley-offga birinchi o‘rin bilan yo‘l oldi. 1/8 finalda “qirollik klubi”ga Bergamoning “Atalanta”si duch keldi. Zidan shogirdlari Jan Pyero Gasperini jamoasini ikkala bahsda ham (safarda 1:0, Madridda 3:1) taslim etdi va chorak final yo‘llanmasiga ega chiqdi.

“Liverpul” Madrid jamoasiga qaraganda guruh bosqichini bir muncha oson tarzda o‘tkazdi. Mersisayd jamoasi guruhda “Atalanta”, “Ayaks”, “Midtyulland” bilan kurashib, 1-pog‘ona bilan nimchorak finalga chiqdi. U yerda esa mersisaydliklar “Leypsig”ga ro‘baro‘ keldi. Yurgen Klopp jamoasi “buqalar”ni ikkala o‘yinda ham bir xil — 2:0 hisobida mag‘lub etgan holda navbatdagi bosqich yo‘llanmasini qo‘lga kiritdi.

Asosiy voqeliklar

“Real Madrid”

1. Uzoq kutilgan Serxio Ramos va Muhammad Saloh o‘rtasidagi duel bo‘lmaydi. 1/4 finali qur’asidan so‘ng ko‘plar tilidan Ramos va Saloh tushmay qoldi. OAV ham Chempionlar Ligasi 2017/18-yilgi mavsumi finalida bo‘lgan voqeani esga sola boshladi. 3 yil oldingi final bahsida Saloh Ramos bilan kurashdan so‘ng yelkasini jarohatlab olgan va o‘yinni oxirigacha davom ettira olmagandi. Keyin esa “Liverpul” o‘yinni boy bergani muxlislar yodidan ko‘tarilmagan bo‘lsa kerak. O‘shanda futbol muxlislarining fikri ikki qutbga bo‘lingandi: bir tomon Ramos—Saloh to‘qnashuvini o‘yinda bo‘lib turadigan holat sifatida baholagan bo‘lsa, ikkinchi tomon Ramos Salohni ataylab safdan chiqardi degan fikrda edi.

O‘yindan oldin jurnalistlar hatto Muhammad Salohni ushbu holat bo‘yicha savolga tutishga ham ulgurdi. Misrlik futbolchi esa to‘qnashuv tarixda qolganini, hozirda faqat yangi o‘yin haqida o‘ylayotganini bildirib “qasos” haqidagi fikrlarni bir chetga surib qo‘ydi. Ramosning jarohati esa bu duel borasidagi gap-so‘zlarga umuman nuqta qo‘ydi.

2. Eden Azar yana “Real”ga yordam bera olmaydi. Belgiyalik futbolchi Madridda ikkinchi yilini o‘tkazmoqda. Biroq “qaymoqranglilar”ning muxlislari ko‘z o‘ngida Azar deganda golli uzatma, gollar, aldamchi harakatlar emas, balki faqat jarohatlangan futbolchi namoyon bo‘lmoqda. 30 yoshli Eden 2020/21-yilgi mavsum “Real” safida atigi 14 ta o‘yinda qatnashdi. Zidan Azarni asosiy tarkib o‘yinchisi sifatida ko‘rishni istagandi, biroq fransuz mutaxassisining istagi allaqachon amalga oshmas orzudek ko‘rinmoqda. Azarning “Liverpul”ga qarshi bahsdan oldin jarohatidan forig‘ bo‘lib safga qaytgani, jamoa bilan guruh mashg‘ulotlarida ishtirok etgani aytilgandi. Biroq shifokorlar uning sog‘lig‘i bilan tavakkal qilmagan ma’qul degan qarorga keldi va Azar “Real”ning “Liverpul”ga qarshi o‘yin qaydnomasidan o‘rin olmadi. Qayd etish joiz, Eden faoliyati davomida “Liverpul”ga qarshi 18 marta o‘ynagan va uning statistikasi quyidagicha: 7 ta gol, 2 ta assist.

3. Benzema qoyilmaqom holatga kirib ulgurdi. Ikkinchi mavsumdirki “Real”da tom ma’nodagi yangi jamoa qurilishi davom etmoqda. Ammo jamoa yetakchilari hamon o‘sha yaqin o‘tmishdagilardir. Xususan, himoyadagi eng ishonchli vakil — Serxio Ramos, markazda o‘sha uchburchak, ya’ni Modrich, Kroos, Kazemiro triosi. Hujumda esa 33 yoshga kirganiga qaramay faollik va sermahsullik namoyish etayotgan Karim Benzema. 2020/21-yilgi mavsumda Benzema 33 ta o‘yinda 24 ta gol urishga erishdi va madridliklarning eng yaxshi to‘purari bo‘lib turibdi. Futbolchi La Ligada oyning eng yaxshi o‘yinchisi bo‘ldi. U ortda qolgan oyda 3 ta o‘yinda 5 ta gol urdi. Fransiyalik futbolchini shunchaki to‘xtatib bo‘lmayapti. Karim ketma-ket 7 ta o‘yinda gol urdi.

4. Rafael Varan o‘yinda ishtirok etmaydi. Fransiyalik himoyachida koronavirus aniqlandi. Zinedin Zidan jamoaning Ramosdan keyin ikkinchi o‘rinda turadigan eng ishonchli himoya vakilidan ham ayrildi. Zizu endi himoya markazini hamon ishonchni oqlamagan Eder Militao va har doim har yerda o‘ynashga tayyor bo‘lgan Nacho Fernandes tandemiga topshirishga majbur.

“Liverpul”

1. “Qizillar” o‘ziga kelmoqdami? Ortda qolgan haftada Yurgen Klopp jamoasi “Emireyts” stadionida “Arsenal”ni 3:0 hisobida tiz cho‘ktirdi. Hisob-ku o‘z yo‘liga, ammo “Liverpul”ning mazkur bahsdagi o‘yini uning avvalgi ikki mavsumdagi yorqin harakatlarini eslatib yuborgani ham rost. “To‘pchilar” ustidan qozonilgan muvaffaqiyat, “Liverpul” uchun ketma-ket 3-quruq g‘alaba bo‘ldi. Mersisaydliklar 2020-yil yozidan beri ketma-ket 3 ta o‘yinda o‘z darvozasidan gol o‘tkazmagan holda g‘alaba qozonmagan edi. To‘g‘ri, bu g‘alabalar orasida FIFA kunlari ham bor. Ammo baribir bunday seriya jamoaning o‘yinida sezilarli darajada oldinga siljish bo‘lganligini ham ko‘rsatadi. So‘nggi vaqtlarda Trent Aleksander-Arnoldning samaradorligi tushib ketgani aytildi. Buning ortidan Garet Sautgeyt futbolchini FIFA kunlarida Angliya milliy terma jamoasiga ham jalb etmadi. Bunga javoban Trent “Arsenal”ga qarshi qoyilmaqom o‘yin o‘tkazdi. 22 yoshli Trent mazkur bahsdagi golli uzatmasi orqali Maykl Ouen, Robbi Fauler kabi yulduz futbolchilarning “Liverpul”da qayd etgan natijasini takrorladi. Gap shundaki, endi mazkur uchala futbolchining hisobida 30 tadan golli uzatma bor. Farq shuki, Ouen bu natijaga erishish uchun 216 ta, Fauler esa 266 ta o‘yinda ishtirok etgan. Aleksander-Arnoldga esa 121 ta o‘yin kifoya qildi. Bir so‘z bilan aytganda Trent yana trendda!

2. Diogu Jota ham katta futbolni sog‘inib qoldi. Portugaliyalik hujumchi 3 oy davomida jarohatini davolatdi. Va safga qaytishi bilan qisqa fursatda o‘zining optimal formasini ham tiklab oldi. Jota safga qaytgach sobiq jamoasi “Vulverhempton”ga qarshi bahsda “Liverpul”ning yagona g‘alaba goliga mualliflik qildi. Keyin esa Portugaliya terma jamoasi ixtiyoriga borib qo‘shildi. JCh—2022 saralashi doirasida Serbiyaga qarshi bahsda dublga erishdi. Eng qizig‘i, 178 santimetr bo‘yga ega futbolchi ikkala golini ham boshi bilan urdi. 24 yoshli Jota “Arsenal”ga qarshi bahsda ham o‘ta faol va samarali o‘ynadi. Uning o‘yindagi hisobni ochuvchi goliga esa aynan tepadagi qahramon Trent assistentlik qildi. O‘yinga yakuniy nuqtani ham Jotaning o‘zi qo‘ydi.

Taxminiy tarkiblar

O‘yinni aniq o‘tkazib yuboradigan futbolchilar

Faktlar:

• “Liverpul”ning Chempionlar Ligasidagi so‘nggi 12 ta o‘yinidan 11 tasida 3 tadan kam gol urilgan.
• “Liverpul” Chempionlar Ligasidagi so‘nggi 9 ta o‘yindan 7 tasida gol o‘tkazmadi.
• “Real” Chempionlar Ligasidagi so‘nggi 6 ta o‘yindan 5 tasidan g‘alaba qozondi.
• “Real”—“Liverpul” qarama-qarshiligidagi so‘nggi 3 ta o‘yinda madridliklar g‘alaba qozongan.

Jamoalarning so‘nggi 10 ta o‘yindagi statistikasi:

Murabbiylar fikri:

Bu jon saqlash uchun kechadigan bahs bo‘lib, 180 daqiqa yoki undan ham ko‘proq davom etishi mumkin. Biz nimani kutishni bilamiz, lekin hozir faqat bo‘lajak bahsga e’tibor qaratamiz, boshqa narsaga emas. Bu mavsumning eng muhim o‘yinidir. Oldingi yildagi finalni eslamaymiz.

“Liverpul” — benuqson jamoa. U juda kuchli hujumga ega va umuman olganda, uni qiyin raqib deyish mumkin. “Liverpul” yaxshi jamoaviy futbol namoyish etmoqda. Har ikkala tomonda ham jarohatlangan o‘yinchilar bor, ammo bu futbolning bir qismidir. Kuch jamoaviy o‘yindan kelib chiqadi.

Zinedin Zidan, “Real” bosh murabbiyi

Bu juda hayajonli. Juda murakkab qur’a bo‘ldi, ammo meni barcha narsa qoniqtirmoqda. Chunki boshqa jamoalar ham juda kuchli.

Ushbu uchrashuvlarni chindan ham intiqlik bilan kutyapman. So‘nggi uchrashganimizdan atigi ikki yil o‘tdi va bu biz uchun qiyin kecha bo‘lgandi, shuning uchun ularga qarshi yana maydonga chiqish imkoniyatini qo‘lga kiritish — juda zo‘r.

Yurgen Klopp, “Liverpul” bosh murabbiyi

Demak, o‘tkazib yubormang! “Real”—“Liverpul” uchrashuvi 00:00 da boshlanadi. O‘yindagi gollarni bu yerda tomosha qilib borish mumkin — video.