Janubiy Koreyada koronavirus pandemiyasining to‘rtinchi to‘lqini boshlanishi mumkin. Bu haqda mamlakat bosh vaziri Chung Sye Kyun xavotir bilan ma’lum qildi, deb yozadi KBS World.

Foto: Global Look Press

Hukumat yig‘ilishida bosh vazir mamlakat epidemiyaga qarshi kurashda o‘ta og‘ir vaziyatga tushib qolganini aytdi. Uning ta’kidlashicha, o‘tgan bir hafta ichida infeksiyaning metropoliten hududida ham, boshqa hududlarda ham tarqalishda davom etishi fonida mamlakatda virusga chalinganlar sonining kunlik o‘sishi 500 kishidan oshgan.

Shundan kelib chiqqan holda, har bir yuqtirgan odam virusni yana bir nechta kishiga yuqtiradi. Ta’kidlanishicha, agar ushbu tendensiya davom etsa, respublika hokimiyati cheklov choralarini kuchaytirishga va mavjud ijtimoiy masofani saqlash shartlarini maksimal darajaga chiqarishga majbur bo‘ladi.

Bosh vazir yakshanba kuni jamoatchilikni karantin qoidalariga nisbatan hushyor bo‘lishga chaqirdi. Janubiy Koreyada pandemiya boshidan beri kasallikka chalinish bo‘yicha, 105 752 ta holat aniqlangan, 96,9 ming bemor sog‘aygan, 1 748 kishi infeksiya qurboni bo‘lgan.

Hindistonda va Xitoyda kasallanish rekord darajada o‘sdi

Hindistonda o‘tgan kun (4-aprel) davomida COVID-19 yuqtirish bo‘yicha 103 mingdan ortiq yangi holat qayd etildi. Ta’kidlanishicha, sutkalik yuqtirishning bu qadar yuqori ko‘rsatkichi 2020-yilning sentabridan beri birinchi marta kuzatilmoqda.

O‘tgan kunda infeksiyaga eng ko‘p chalinish holati Mumbay shahrida joylashgan Maxarashtra shtatida aniqlandi. 5-apreldan boshlab ushbu shtatda cheklov choralari kuchaytiriladi: kinoteatrlar, restoranlar va do‘konlar yopiladi.

Bundan tashqari, so‘nggi 24 soat ichida Hindistonda COVID-19 oqibatida 478 ta o‘lim qayd etilgan. Mamlakatda pandemiya boshlanganidan beri koronavirus qurboniga aylanganlar 165 ming kishini tashkil etmoqda.

So‘nggi yetti kun ichida Hindistonda kuniga o‘rtacha 73 ming kishida COVID-19 aniqlandi. Pandemiya boshidan buyon ushbu mamlakatda 12,5 milliondan ortiq odam virusni yuqtirib olgan.

Xitoyda esa o‘tgan bir kecha-kunduzda 32 kishida koronavirus aniqlandi, bu so‘nggi ikki oydagi eng yuqori ko‘rsatkich.

Ta’kidlanishicha, mazkur yuqtirganlarning yarmidan ko‘pi — 17 kishi chet eldan kelgan, virusni mamlakat ichkarisida yuqtirgan 15 kishi Myanma, Laos va Vyetnamning janubidagi Yunnan provinsiyasida joylashgan Juyli shahriga to‘g‘ri kelmoqda. Infeksiya oqibatida yangi o‘limlar qayd etilmagan.

31-mart kuni Xitoy rasmiylari Yunnanda birinchi bor to‘qqiz kishida virus aniqlangani haqida xabar bergandi. Ularning barchasi Juylida qay etilgan bo‘lib, hozirda bu shahar infeksiya tarqalishining provinsiya darajasidagi episentriga aylangan. Bugungi kunga qadar provinsiyada 51 ta COVID-19 yuqtirish holati qayd etilgan, shundan 48 tasi mahalliy va uchtasi chetdan kelgan kishilarga to‘g‘ri keladi.

Juylidagi mahalliy hokimiyat shahar aholisining barchasi uchun uy karantini joriy qildi, bir qator korxonalarning faoliyati to‘xtatildi va Xitoy chegarasidan noqonuniy kesib o‘tishlar ustidan nazorat kuchaytirildi.

Umumiy hisobda pandemiya boshidan beri Xitoyda 90 ming 305 kishi infeksiyani yuqtirib olgan, 4 ming 636 kishi kasallikdan vafot etgan, 85 ming 431 kishi tuzalgan. Ayni paytda 238 nafar bemor kasalxonalarda davolanmoqda.