Айни вақтда қамоқхонада жазо муддатини ўтаётган россиялик сиёсатчи, мухолифат вакили Алексей Навальний очлик эълон қилди. Бу ҳақда сиёсатчининг Instagram’даги саҳифасида хабар берилган.

Фото: AP Photo

«Мен шифокор чақириш ва дори-дармонлар олиш ҳуқуқига эгаман. Аммо шифокор ҳам, дорилар ҳам олиб келинмаяпти. Белимдаги оғриқ оёғимга ўтди. Дастлаб ўнг, кейинчалик чап оёғимнинг сезиш қобилиятлари йўқолди. Ҳазил ҳазил билан, бироқ вазият кескинлашиб бормоқда. Қонун ижроси таъминланмагани ва ҳузуримга шифокор олиб келинмагани сабабли очлик эълон қилдим», — дейилади хабарда.

Эслатиб ўтамиз, 17 февралда Европа Инсон ҳуқуқлари бўйича иттифоқи суд регламентининг 39-қоидасига кўра, Навальнийни зудлик билан тергов изоляторидан чиқаришни талаб қилган. Навальнийнинг адвокати Ольга Михайлова иттифоқнинг илк бор бундай талаб билан чиққани ва Россия ҳукумати буни эътиборсиз қолдирмаслиги кераклигини айтган.

Кремль Европа Инсон ҳуқуқлари бўйича иттифоқининг талабини ҳуқуқий асосга эга эмас деб топган ва уни бажаришдан бош тортган.

Навальний Россиянинг Владимир вилоятидаги 2-сонли ахлоқ тузатиш колониясида жазо ўтамоқда. Аввал Навальнийнинг адвокатлари колонияда сиёсатчининг соғлиғи ёмонлашиб, елкаси, сўнг оёғи оғриб қолгани, аммо унга керакли тиббий ёрдам кўрсатилмагани ҳақида хабар берган. Федерал жазони ижро этиш хизмати, ўз навбатида, Навальнийнинг аҳволини «барқарор ва қониқарли деб баҳолаганини» маълум қилганди.

Кейинчалик Россия президенти Владимир Путин Германия канцлери Ангела Меркель ва Франция президенти Эммануэль Макрон билан видеоконференцалоқа орқали музокаралар ўтказгани, Германия ва Франция раҳбарлари Путиннинг эътиборини Россия мухолифати раҳбари Алексей Навальнийнинг ҳуқуқларини ҳурмат қилиш ва «соғлиғини асраш» зарурлигига қаратгани ҳақида хабар қилинган.

Алексей Навальний «Новичок»дан заҳарланганидан кейин Германияда даволаниб қайтгач, 2021 йил 17 январда Жазони ижро этиш федерал хизмати талабига кўра Шереметьево аэропортида ҳибсга олинган. 2 февралда Москвадаги Симонов суди Навальнийага нисбатан «Ив Роше» иши бўйича шартли муддатни қамоқ жазосига алмаштирган. Навальний маълум муддат тергов изоляторида бўлгани ва уй қамоғида ҳам сақлангани инобатга олинган ҳолда унга икки ярим йилдан кўпроқ муддатга озодликдан маҳрум қилиш жазоси тайинланган. У Владимир вилоятидаги ИК-2 қамоқхонасида жазо муддатини ўтамоқда.

23 январда Россиянинг 100 дан ортиқ шаҳарларида Алексей Навальнийни қўллаб-қувватлаш мақсадида норозилик намойишлари ўтказилган. Кейинчалик 31 январь, 2 ва 14 февралда ҳам намойишлар бўлиб ўтган. «ОВД-Инфо» берган маълумотларга кўра, намойишлар туфайли 11 мингга яқин одам ҳибсга олинган.