Жаҳон соғлиқни сақлаш ташкилоти (ЖССТ)нинг халқаро экспертлар гуруҳи томонидан SARS-CoV-2 коронавирусининг келиб чиқишини аниқлаш мақсадида Уханда ўтказилган текширув натижалари тўғрисидаги ҳисобот эълон қилинди. Ҳисоботдан маълум бўлишича, миссия коронавируснинг асл манбасини аниқлай олмади, деб ёзади «РБК».
Ҳисоботда вируснинг келиб чиқишига оид тўртта тахмин келтирилган. Хусусан, мутахассислар вирусни кўршапалаклардан воситачи ҳайвон орқали одамларга юқишини пандемиянинг энг эҳтимолий варианти деб атади. Вирусни кўршапалаклардан тўғридан-тўғри юқтириш эҳтимоли ҳам келтириб ўтилди.
Музлатилган ёки совутилган озиқ-овқат орқали вирусни юқтириш, шунингдек, вируснинг Ухань шаҳридаги лабораториядан тарқалиши эҳтимоллари «жуда кам» деб баҳоланди. ЖССТ раҳбари Тедрос Адханом Гебрейесуснинг айтишича, вируснинг лабораториядан сизиб чиқиши ҳақидаги гипотезани текшириш давом этади. «Жамоа вируснинг лабораторияда пайдо бўлиши эҳтимолдан йироқ гипотеза, деган хулосага келган бўлса-да, бу махсус мутахассислар иштирокида қўшимча текширувни талаб қилади, мен бундай миссияни тузишга тайёрман», — деди у.
Халқаро экспертлар гуруҳи Ухань шаҳрида 2021 йил 14 январдан 10 февралгача текширув ўтказган эди. Жамоа таркибида Хитойдан 17 нафар ва бошқа мамлакатлардан 17 нафар мутахассис бўлган.
Шу билан бирга, АҚШ ва яна 13 мамлакат ЖССТнинг COVID-19 келиб чиқиши тўғрисидаги ҳисоботидан хавотир билдирди.
«Биз Жаҳон соғлиқни сақлаш ташкилотининг яқинда Хитойда ўтказган тадқиқотининг умумий хавотирларга қўшиламиз, аммо шу билан бирга, келажакда келиб чиқиши мумкин бўлган бу каби номаълум эпидемияларни халқаро баҳолаш учун тезкор, самарали, шаффоф, далилларга асосланган ва мустақил жараённи ишлаб чиқиш ва бошқариш бўйича биргаликда ишлаш зарурлигини алоҳида таъкидлаймиз», — дейилади АҚШ департаментининг веб-сайтидаги мурожаатда.
Мурожаатга АҚШдан ташқари, Австралия, Канада, Чехия, Дания, Эстония, Исроил, Япония, Латвия, Литва, Норвегия, Корея Республикаси, Словения ва Буюк Британия қўшилгани кўрсатилган.
Унда ҳайвонларни тадқиқ қилиш зарурлиги таъкидланиб, ЖССТ томонидан олиб борилаётган тадқиқотларнинг иккинчи босқичини тезроқ бошлаш талаб этилган.
Аввалроқ Хитойдаги текширувида иштирок этган мутахассислар коронавирусининг одамлар орасида пайдо бўлиши ва тарқалишига сабаб Ухань шаҳридаги ёввойи ҳайвонларнинг савдоси бўлиши мумкинлигини айтганди. Тахминларга кўра, бозорда сотилган ҳайвонлардан бири вирусни кўршапалакдан одамга юқтирган оралиқ ташувчига айланган.
Шунингдек, чумолихўрлар туркумига яқин сутемизувчи — панголинлар одамларга коронавирус юқтиришда «гумон қилинаётганлар» қаторига киритилган эди. Худди кўршапалаклар сингари улар ҳам Хитойда истеъмол қилинади. Баъзи олимлар айнан танасида вирус бўлган панголинлар Ухань шаҳридаги қишлоқ хўжалиги бозорига келтирилган ва хитойликлар томонидан истеъмол қилинган бўлиши мумкин, деб тахмин қилган эди.
Аввалроқ ЖССТ томонидан пандемия бошида Уханда коронавируснинг 10 дан ортиқ мутацияси бўлгани, Ухань шаҳрида COVID-19 келиб чиқишига оид муҳим далиллар топилгани, Хитой ҳукумати COVID-19’га чалиниш бўйича илк ҳолатлар ҳақидаги маълумотларни беришдан бош тортгани ҳақида хабар берилганди.
Изоҳ (0)