Европа Иттифоқи ва Жаҳон соғлиқни сақлаш ташкилоти (ЖССТ) 30 март куни 25 та мамлакат раҳбарлари билан келишган ҳолда, ОАВ ва ЖССТ веб-сайтида очиқ хат эълон қилди. Хатда COVID-19 сингари пандемия ҳолатлари учун халқаро ҳамкорлик шартномасини ишлаб чиқишга чақирилган, деб ёзмоқда «Коммерсантъ».
Мактубни имзолаганлар орасида ЖССТ бош директори Тедрос Адханом Гебрейесус, Европа Кенгаши раиси Шарл Мишел, Буюк Британия бош вазири Борис Жонсон, Германия канцлери Ангела Меркель, Франция президенти Эммануэль Макрон, Жанубий Африка Республикаси президенти Сирил Рамафоса, Жанубий Корея президенти Мун Чже Ин, Сербия президенти Александр Вучич, Украина президенти Владимир Зеленский ва бошқа бир қатор давлат раҳбарлари бор.
Мактубда айтилишича, «COVID-19 пандемияси дунё ҳамжамияти учун 1940 йиллар давридан кейинги энг жиддий муаммога айланди. Ҳалокатли икки жаҳон уруши якунида сиёсий раҳбарлар бирлашиб кўп қиррали тизим яратган эди. Унда аниқ мақсадлар қўйилган, жумладан, мамлакатлараро илиқ муносабат яратиш, яккаланиш ва миллатчилик васвасаларини бартараф этиш, тинчлик, фаровонлик, соғлиқ ва хавфсизликка оид муаммоларни ҳал қилиш каби».
«COVID-19 пандемияси билан курашиш жараёнида биз ҳамкорликда келажак авлодни ҳимоя қиладиган янада мустаҳкам халқаро соғлиқни сақлаш архитектурасини қуришимиз мумкин. Пандемияга тайёргарлик ва уларга қарши курашиш тўғрисида янги халқаро шартнома тузишда дунё мамлакатлари биргаликда ҳаракат қилиши кераклигига шубҳамиз йўқ. Ушбу янги жамоавий мажбурият пандемияга тайёргарликнинг энг юқори сиёсий даражадаги тарихий босқичи бўлиши мумкин. У ЖССТ низомига асосланиб, бошқа барча муҳим ташкилотларни ушбу миссияни қўллаб-қувватлашга сафарбар этиши мумкин. Бундай шартномани мавжуд глобал ҳужжатлар, хусусан, Халқаро тиббий-санитария қоидалари қўллаб-қувватлайди, бу бизнинг яратиш ва ривожлантириш соҳасидаги саъй-ҳаракатларимизнинг мустаҳкам ва тасдиқланган асоси бўлиб хизмат қилади», — деб ёзади хат муаллифлари.
Қайд этиш жоизки, хатни имзолаганлар орасида АҚШ, Хитой ва Россия вакиллари йўқ.
Аввалроқ ЖССТ томонидан SARS-CoV-2 коронавирусининг келиб чиқишини аниқлаш мақсадида Уханда ўтказилган текширув натижалари тўғрисидаги ҳисобот эълон қилинган эди. Ҳисоботдан маълум бўлишича, миссия коронавируснинг асл манбасини аниқлай олмаган.
АҚШ ва яна 13 мамлакат ЖССТнинг COVID-19 келиб чиқиши тўғрисидаги ҳисоботидан хавотир билдирган. АҚШ департаменти веб-сайтида эълон қилинган мурожаатда келажакда келиб чиқиши мумкин бўлган номаълум эпидемияларни халқаро баҳолаш учун тезкор, самарали, шаффоф, далилларга асосланган ва мустақил жараённи ишлаб чиқиш ва бошқариш бўйича биргаликда ишлаш зарурлиги таъкидланган.
Изоҳ (0)