Тошкентда дорихонага кириб, сотувчининг телефонини талончилик йўли билан олиб қочган шахс ушланди, дея хабар бермоқда Тергов департаменти.
Маълум қилинишича, 2021 йилнинг 26 март куни 26 ёшли Ҳ.М. Учтепа тумани 11-мавзеда жойлашган ўзига тегишли дорихонада савдо қилаётган вақтида номаълум шахс дорихонага келиб, у ерда жанжал чиқариб, Ҳ.М.нинг қўлида бўлган Samsung А50 русумли телефон аппаратини талончилик йўли билан тортиб олган.
Шундан кейин у дорихонадан чиқиб, қочаётган вақтида ушбу ҳудудда хизмат олиб бораётган ИИБ ходимлари томонидан ушланган. Унинг ёни холислар иштирокида кўздан кечирилганда қизил рангли изолентага ўралган оқ рангли, ўткир ҳидли кукунсимон модда борлиги аниқланиб, ашёвий далил тариқасида расмийлаштириб олинган.
Терговга қадар текширув ҳаракатлари давомида ушбу жиноятни муқаддам бир неча маротаба судланган 30 ёшли А.И. содир этганлиги аниқланган.
Мазкур ҳолат юзасидан Учтепа тумани бўйича ИИО ФМБ ҳузуридаги тергов бўлинмаси томонидан Жиноят кодексининг 166-моддаси 3-қисми «б» банди (уй-жойга, омборхона ёки бошқа хонага ғайриқонуний равишда кириб, талончилик содир этиш) билан жиноят иши қўзғатилиб, гумон қилинувчи тариқасида жалб қилинган.
Тергов давом этмоқда.
Маълумот учун, бу турдаги жиноятлар учун Жиноят кодексининг нормаларига кўра 5 йилдан 10 йилгача озодликдан маҳрум қилиш жазоси тайинланади.
Бундан аввал Зангиотада 19 ёшли қизни кимсасиз жойга олиб бориб, уни тирноқ олувчи «кусачка» билан қўрқитиб, телефон ва тақинчоқларини ўмарган ҳайдовчи ушлангани, Нукусда болаларнинг ёлғиз қолганидан фойдаланиб, уйга алдов йўли билан кириб, 25 миллион сўмлик тилла тақинчоқларни ўғирлаб кетган шахслар ушлангани ҳамда Фарғонада Наврўз байрамида талончилик содир этган шахслар қўлга олингани ҳақида хабар берилганди.
Изоҳ (0)