Toshkentda dorixonaga kirib, sotuvchining telefonini talonchilik yo‘li bilan olib qochgan shaxs ushlandi, deya xabar bermoqda Tergov departamenti.
Ma’lum qilinishicha, 2021-yilning 26-mart kuni 26 yoshli H.M. Uchtepa tumani 11-mavzeda joylashgan o‘ziga tegishli dorixonada savdo qilayotgan vaqtida noma’lum shaxs dorixonaga kelib, u yerda janjal chiqarib, H.M.ning qo‘lida bo‘lgan Samsung A50 rusumli telefon apparatini talonchilik yo‘li bilan tortib olgan.
Shundan keyin u dorixonadan chiqib, qochayotgan vaqtida ushbu hududda xizmat olib borayotgan IIB xodimlari tomonidan ushlangan. Uning yoni xolislar ishtirokida ko‘zdan kechirilganda qizil rangli izolentaga o‘ralgan oq rangli, o‘tkir hidli kukunsimon modda borligi aniqlanib, ashyoviy dalil tariqasida rasmiylashtirib olingan.
Tergovga qadar tekshiruv harakatlari davomida ushbu jinoyatni muqaddam bir necha marotaba sudlangan 30 yoshli A.I. sodir etganligi aniqlangan.
Mazkur holat yuzasidan Uchtepa tumani bo‘yicha IIO FMB huzuridagi tergov bo‘linmasi tomonidan Jinoyat kodeksining 166-moddasi 3-qismi “b” bandi (uy-joyga, omborxona yoki boshqa xonaga g‘ayriqonuniy ravishda kirib, talonchilik sodir etish) bilan jinoyat ishi qo‘zg‘atilib, gumon qilinuvchi tariqasida jalb qilingan.
Tergov davom etmoqda.
Ma’lumot uchun, bu turdagi jinoyatlar uchun Jinoyat kodeksining normalariga ko‘ra 5 yildan 10 yilgacha ozodlikdan mahrum qilish jazosi tayinlanadi.
Bundan avval Zangiotada 19 yoshli qizni kimsasiz joyga olib borib, uni tirnoq oluvchi “kusachka” bilan qo‘rqitib, telefon va taqinchoqlarini o‘margan haydovchi ushlangani, Nukusda bolalarning yolg‘iz qolganidan foydalanib, uyga aldov yo‘li bilan kirib, 25 million so‘mlik tilla taqinchoqlarni o‘g‘irlab ketgan shaxslar ushlangani hamda Farg‘onada Navro‘z bayramida talonchilik sodir etgan shaxslar qo‘lga olingani haqida xabar berilgandi.
Izoh (0)