Тошкентда хонадонга чақирилган тез тиббий ёрдам шифокорига бемор томонидан оғир тан жароҳати етказилди

Тошкентда бемор тез тиббий ёрдам шифокори бошига қаттиқ жисм билан уриб, унга оғир тан жароҳати етказди, дея хабар қилмоқда Соғлиқни сақлаш вазирлиги матбуот хизмати.

Қайд этилишича, 2021 йилнинг 26 март куни соат 23:43 да Тошкентдаги 103 диспетчерлик хизматига Миробод туманида истиқомат қилувчи 19 ёшли фуқаро А.дан чақириқ келиб тушади.

Кўрсатилган манзилга тез тиббий ёрдам бригадаси (шифокор – 1995 йилда туғилган Б.Ҳ.) 7 дақиқа ичида зудлик билан етиб боради. Бемор кўрикдан ўтказилаётган вақтда тўсатдан шифокор Б.Ҳ.га сабабсиз ташланиб, унинг бошига қаттиқ жисм билан уриб, оғир тан жароҳати етказади.

Шифокорнинг олган жароҳатидан кучли қон кетаётгани сабаб воқеа жойидан тез тиббий ёрдам автомашинасида Тиббиёт ходимларининг касбий малакасини ривожлантириш марказининг кўп тармоқли клиникасига олиб борилган. Кейинчалик эса беморнинг аҳволи яхши эмаслиги ва жароҳати ўта оғирлигини инобатга олиниб, Республика шошилинч тиббий ёрдам илмий марказига ўтказилган.

«26 ёшли тез тиббий ёрдам шифокори Б.Ҳ. айни пайтда марказимизнинг нейрореанимация бўлимида оғир аҳволда интенсив даво муолажаларини олмоқда. У ҳозир оғир аҳволда, беморга бош мия ёпиқ жароҳати, бош миянинг ўрта даражадаги лат ейиши, бош тепа ва энса соҳаларидаги йиртилган жароҳат ташхиси қўйилган», — дейди Республика шошилинч тиббий ёрдам илмий маркази бош директори Даврон Тўлаганов.

Даставвал Тиббиёт ходимларининг касбий малакасини ривожлантириш марказининг кўп тармоқли клиникасига олиб борилган Б.Ҳ.нинг бошидан кучли қон кетаётгани сабаб қон тўхтатиш учун бошнинг тепа ва энса соҳаларидаги жароҳатга 4 та чок қўйилган.

Вазирлик бу учун ҳуқуқни муҳофаза қилиш органларидан айбдорларга нисбатан тегишли жазо чораларини қўллашни талаб этиб, уни назорат қилишини таъкидлаб ўтган.

Маълум қилинишича, Тошкент шаҳри тез тиббий ёрдам бригадалари томонидан 2021 йилнинг январь ойида 82 минг 462 та, февраль ойида 80 минг 290 та ва 1 мартдан то 27 мартгача 80 минг 531 та чақириқларга ўз вақтида зудлик билан тиббий ёрдам кўрсатилган. 2020 йил ушбу тизимга мамлакат бўйича 11 ярим миллиондан ошиқ мурожаатлар келиб тушган.

Бундан аввал Тошкентда маст эркак шифокор аёлни калтаклаб, жиддий жароҳат етказгани, Жиззахда чақирув бўйича етиб келган шифокор хонадон эгасининг ўғли томонидан калтаклангани ҳамда Самарқандда шифохона қоровули ва шифокорини урган шахсга нисбатан жиноят иши қўзғатилгани ҳақида хабар берилганди.