АҚШ президенти Жо Байден 2024 йилда иккинчи муддат учун ўз номзодини қўйишини маълум қилди, деб ёзади «РБК». Бу ҳақда у ўзининг биринчи омма олдидаги матбуот анжуманида айтиб ўтди.
«Менинг жавобим — ҳа. Мен иккинчи муддатга номзодимни қўйишни режалаштиряпман», — деди у.
78 ёшли Байден ўтган йил кузида бўлиб ўтган сайловларда ғолиб чиқди. Президент лавозимини эгаллаганига бор-йўғи 65 кун бўлди.
Демократик партия Байденни президент сайловидаги ягона номзоди сифатида 2020 йилнинг 19 августида тасдиқлаган эди. Қарор Милуоки (Висконсин штати)даги умуммиллий қурултойда қабул қилинди. Байденнинг ўзи эса номзодини қўйишга 2020 йилнинг апрелидаёқ қарор қилган эди. Демократлардан ягона номзодликка ўндан ортиқ одам даъвогарлик қилган, улар орасида Вермон штатидан сенатор 78 ёшли Берни Сандерс ва Нью-Йорк собиқ мери Майкл Блумберг ҳам бор эди. Сандерс охирги бўлиб давлат раҳбари сайловидан ўз номзодини олиб ташлади, бу Байденга Демократик партиядан ягона номзод бўлиш ҳуқуқига даъвогарлик қилувчи ягона сиёсатчига айланиш имконини берди. Республикачилар партиясидан эса иккинчи муддат учун амалдаги президент Дональд Трамп номзоди илгари сурилди. 2020 йилдаги сайловларда мағлуб бўлганидан кейин Трамп 2024 йилги президент сайловида қатнашиши ҳақида бир неча марта айтиб ўтди.
2020 йилги сайловда ғалаба қозонишидан аввал Байден икки марта — 1988 ва 2008 йилларда президент сайловига ўз номзодини қўйган. Биринчи уринишида дастлабки сайловлар босқичига етмасдан номзодини олиб ташлаган. Иккинчисида, 2008 йилда эса праймериздан кейин, Айова штатида бешинчи натижага эришгач, номзодини қайтариб олган. Шундан кейин бўлғуси президент Барак Обама Байденни сайлов кампаниясида вице-президентликка номзод сифатида қатнашишга таклиф қилган ва ўша йил ноябрида республикачи Жон Маккейн устидан ғалаба қозонди (у вице-президентликка Сара Пейлинни танлаган эди).
2024 йилги сайловларда Байден 81 ёшда бўлади. Агар у сайловда қатнашиб, ғолиб бўлса, ўз рекордини янгилаб, иккинчи марта АҚШ тарихидаги энг кекса президентга айланади. Шунингдек, Байден бир пайтлар АҚШнинг энг ёш сенатори деб ҳам эътироф этилган: 1973—1979 йилларда, 30—36 ёшларида у сенатор бўлган.
Изоҳ (0)