Мисрда иккита йўловчи поездининг ўзаро тўқнашиши оқибатида камида 32 нафар одам ҳалок бўлди, яна 91 киши турли даражадаги тан жароҳатлари олди. Бу ҳақда Al Jazeera хабар қилган.
Тўқнашув 26 март куни мамлакат жанубидаги Сохаг ҳудудида содир бўлган. Ҳалокат жойига 60 га яқин тез ёрдам машиналари юборилган, улар авария оқибатида жароҳат олганларни яқин атрофдаги шифохоналарга етказган.
Поездларнинг у қадар катта тезликда ҳаракатланмагани бири бошқасининг ортидан юргани маълум қилинган. Тўқнашувдан кейин иккита вагонга жиддий талафот етган, уларнинг бири ағдарилиб қолган.
Миср темир йўллар бошқармасининг ахборотига кўра, поездлардан бири Луксор—Александрия йўналишида номаълум шахслар томонидан стоп-кран механизми ишга туширилиши оқибатида тўхтаган.
Бу вақтда тўхтаб қолган поездни ортдан келаётган бошқа бир Асуан—Қоҳира йўналишидаги поезд келиб урган. Ушбу таркиб машинисти ўз вақтида поездни тўхтата олмаган, оқибатда мудҳиш ҳалокат содир бўлган. Биринчи поезднинг охирги икки вагони, иккинчисининг эса тепловоз қисмига зарар етган.
Содир бўлган ҳалокатнинг суриштирув ишларини махсус техник комиссия тафтиш қилади. Миср президенти Абдул Фаттоҳ ас-Сиси авариянинг содир этилишида айбдор бўлган шахсларни қилмишига яраша жазолаш зарурлигини таъкидлаган.
Мисрда поездлар тўқнашувлари аввал ҳам тез-тез содир бўлган, хусусан 2017 йилда Мисрнинг Искандария шаҳрида икки поезднинг тўқнашиб кетиши оқибатида 36 киши, 2019 йилда мамлакат шимолидаги ва Қоҳира вокзалида юз берган 2 та аварияда 28 киши ҳалок бўлган. Шунингдек, 2019 йилда Покистоннинҳ Панжоб вилоятида темир йўл поездида ёнғин чиқиши оқибатида 60 дан зиёд одам ҳаётдан кўз юмганди.
Изоҳ (0)