Shimoliy Koreya yetakchisi Kim Chen In qo‘mondonlik tarkibini o‘zgartirdi va KXDR armiyasining harbiy dengiz kuchlari hamda harbiy havo kuchlariga yangi qo‘mondonlar tayinladi. Bu haqda Tengrinews xabar berdi.

Foto: TJournal

Koreya Ishchilar partiyasining (WPK) Sakkizinchi Markaziy harbiy komissiyasining birinchi kengaytirilgan majlisi rahbariyatda bir qator mutaxassislarning o‘zgarishiga olib keldi. Xususan, harbiy dengiz kuchlari qo‘mondoni etib admiral o‘rinbosari Kim Son Gil, harbiy havo va havo hujumidan mudofaa kuchlariga general-leytenant Kim Chxun Il tayinlandi.

Mamlakat mudofaa vaziri Kim Chjon Gvan va Koreya xalq armiyasining siyosiy bo‘limi boshlig‘i Kvon Yen Chjin vitse-marshall lavozimlarini egalladi.

Shuningdek, Shimoliy Koreya rahbari qurolli kuchlar nazoratini va intizomini kuchaytirishga chaqirdi. Ma’lumotlarga ko‘ra, KXDR yetakchisi keyingi besh yil ichida yangi siyosiy maqsadlarni, jumladan, yadro ombori qurish va artilleriyalarni rivojlantirish uchun Mehnat partiyasi majlisini chaqirgan.

“Harbiy qo‘shinda yangi islohotlar joriy etilishi armiyaning harakatlari muvaffaqiyatini yoki muvaffaqiyatsizligini belgilab beradi”, — dedi Kim Chen In.

Yig‘ilishda harbiylarning siyosiy faoliyat va tartib-intizomga oid bir qator masalalari ko‘rib chiqildi.

Avvalroq Kim Chen In Koreya Mehnat partiyasining bosh kotibiga aylangani haqida xabar berilgan edi.