Сўнгги бир кеча-кундузда юз берган коронавирус билан боғлиқ энг муҳим хабарлар — «Дарё» коронадайжестида.
Дунё пандемиянинг авж нуқтасидан ўтиб бўлди
COVID-19’га чалиниш бўйича маҳаллий авж олишлар юз бериши мумкин, аммо умуман олганда дунёда пандемиянинг авж нуқтасидан ўтиб бўлинди. Бундай фикрни Россия Фундаментал ва трансляцион тиббиёт федерал тадқиқот маркази экспериментал моделлаштириш ва юқумли касалликлар патогенези бўлими бошлиғи Александр Шестопалов билдириб ўтди.Унинг сўзларига кўра, SARS-CoV-2’нинг бундан кейинги мутациялари вакцинацияга нисбатан реакция бўлиб чиқиши ҳам мумкин, чунки вирус шу пайтгача ҳам барқарорлашмаган.
«Гриппга келсак, бу эпидемик мавсумда у ҳақиқатан ҳам кетди, аммо кейинги мавсумда у албатта қайтиб келади», — дея таъкидлади у.
Парранда гриппининг янги А(H5N8) штамми ҳақида гапирар экан, Шестопалов у ҳам бошқа штаммлар каби кўчманчи қушлар томонидан тарқатилишини айтди. Айни пайтда бундай ҳолатлар Украина жанубида ҳамда Шимолий Кавказда ва Россияда қайд этилган.
Евроиттифоқ коронавируснинг учинчи тўлқинини бошдан ўтказмоқда
Еврокомиссия раҳбари Урсула фон дер Ляйен коронавируснинг учинчи тўлқинига дуч келган Евроиттифоқ мамлакатларидаги эпидемик вазият юзасидан хавотир билдирди.Биз Европада COVID-19’нинг учинчи тўлқини бошидамиз. Евроиттифоққа аъзо мамлакатларнинг кўпчилигида касалланиш ҳолатлари яна кўпаймоқда, бунга асосий сабаб B.1.1.7 варианти (‘британча’ штамм) бўлиб, у ҳозир Европанинг деярли ҳар битта мамлакатида бор», — деди фон дер Ляйен Евроиттифоқ давлат ва ҳукумат раҳбарларининг онлайн шаклда ўтказилган саммитида.
Унинг сўзларига кўра, Евроиттифоқ айни пайтда коронавирусга қарши 88 миллион доза вакцина қабул қилиб олган, 62 миллион марта вакцина юборилган. 18,2 миллион киши ёки аҳолининг 4,1 фоизи иккала дозани ҳам қабул қилган. Ёзда Евроиттифоқ аҳолисининг (вояга етган қисмининг) 70 фоизи эмланган бўлиши керак.
Еврокомиссия Европада COVID-19’нинг учинчи тўлқини бошлангани ҳақида 19 мартда эълон қилган эди. Евроиттифоқ мамлакатлари аҳолини эмлашни тезлаштиришга даъват этилди. Германия соғлиқни сақлаш вазири Йенс Шпан эса вируснинг янги тўлқинини енгиш учун Евроиттифоқда вакциналар етишмаслиги ҳақида огоҳлантирди.
Айни пайтда Евроиттифоқда COVID-19’га қарши тўртта вакцина маъқулланган, булар — Американинг Pfizer ва Германиянинг BioNTech компаниялари, Американинг Moderna ва Janssen (Johnson & Johnson’га тегишли), шунингдек, AstraZeneca Британия-Швеция компанияси вакциналаридир.
COVID-19 билан касалланиб ўтганларнинг қарийб 100 фоизида неврологик асоратлар кузатилмоқда
COVID-19 коронавируси билан оғриб ўтганларнинг 99 фоизида неврологик асоратлар кузатилган, булар бош оғриғи ва ҳис қилишнинг бузилишидан тортиб, депрессиягача бўлган ҳолатлардир. Бу ҳақда Россия Соғлиқни сақлаш вазирлигининг тиббий реабилитация бўйича штатдан ташқари бош мутахассиси Галина Иванова маълум қилди.«Коронавирус инфекциясининг неврологик аломатлари кундан кунга, ойдан ойга янада кўпайиб, тобора кучлироқ ва оғирроқ бўлиб бормоқда, булар бош оғриғи, сезувчанликнинг бузилиши, ҳид ва таъм билишнинг бузилиши, парез (фалажнинг енгил шакли), фалажликлар, турли даражадаги когнитив бузилишлар, саросима ва депрессия бўлиб, улар коронавирус инфекциясини бошидан ўтказган беморларнинг қарийб 99 фоизида қайд этилмоқда», — деди у.
Чоп этилган мақолаларга таянган ҳолда, Иванова коронавирус асоратларини тўртта гуруҳга ажратди. Биринчи гуруҳга экспертлар гипоксия, бронхиал клиренснинг бузилиши, кўкрак қафасидаги оғриқлар, юрак оғриқлари, ритмнинг бузилиши ва миокардитлар ривожланишида акс этувчи кардиореспиратор бузилишларини киритади. Неврологик асоратлар иккинчи гуруҳга киради. Учинчи гуруҳ эса мускул-скелет бузилишларидан иборат бўлиб, улар бўғимлардаги оғриқлар, уларнинг шамоллаши, мускул оғриқлари, эгилувчанликнинг камайиши, саркопениянинг ривожланиши билан пайдо бўлади. Диарея ва иштаҳанинг пасайиши, кўнгил айниши, жигар соҳасидаги оғриқ, қондаги қанд миқдорининг ошиши каби метаболик бузилишлар эса тўртинчи гуруҳга киради.
Унинг сўзларига кўра, касалланиб ўтганлар юқоридаги белгиларнинг энг кучли намоён бўлгани бўйича ихтисослашган муассасада реабилитациядан ўтиши керак.
Шунингдек:
- 26 март ҳолатига дунёда пандемия бошидан буён коронавирусга чалинганлар сони 125 431 910 кишини ташкил қилмоқда. Жонс Ҳопкинс университети маълумотларига қараганда, COVID-19 билан боғлиқ ўлимлар 2 755 210 тага етган. Касалланганлар сони 10 миллион ва ундан юқори бўлган мамлакатларга АҚШ, Бразилия ва Ҳиндистон киради.
- Шимолий Атлантика альянси — НАТО бош қароргоҳида 25 март куни ходимларни коронавирусга қарши эмлаш бошланди. Аввалроқ 20 нафар полшалик мутахассислар томонидан амалга ошириладиган вакцинация чоғида қарийб 3,5 мингта дозадаги AstraZeneca дорисидан фойдаланилиши маълум қилинган эди. Эмланиш таклифи НАТО бош қароргоҳидаги барча ходимларга, шунингдек, 30 та миллий делегацияларда ишлайдиган одамлар учун ҳам амал қилади.
- AstraZeneca Британия-Швеция компанияси билан бирга коронавирусга қарши вакцина ишлаб чиққан Оксфорд университети бурунга сепиладиган дори шаклидаги AZD1222 вакцинасини клиник синовдан ўтказиш учун иштирокчиларни йиғишни бошлади. Синовларнинг биринчи босқичи 30 нафар вояга етган шахс иштирокида келаси ҳафтадаёқ бошланади ва тўрт ой давом этади.
Изоҳ (0)