Жессика Альба актрисалик карьерасининг энг юқори чўққисида янги имкониятларни кашф этишга қарор қилди. 39 ёшида муваффақиятли тадбиркорга айланган Голливуд юлдузи Ромпер журналига берган интервьюсида ҳаётидаги ўзгаришлар ҳақида гапириб берди, деб ёзади ELLE.
«Онамга саратон касаллиги ташхиси жуда эрта, 20 ёшлигида қўйилган. Ўзим ҳам сурункали касалликлар билан улғайганман. 11 ёшимгача 5 маротаба жарроҳлик амалиётини ўтказганман. Доимий аллергия туфайли тез-тез шифохонага ётқизилар эдим, − дейди у. – Қизалоғим дунёга келганида эса, ичимда қандайдир ҳис пайдо бўлди. Мен бу дунёга олиб келган жажжи одамчам билан яшашни, имкон қадар у билан кўпроқ вақт ўтказишни хоҳлаётганимни англадим. Саломатлик энг қадрли нарса эканини тушуниб етдим. У бўлмаса, бахтли бўлиш ҳам қийин. Буни англаш менга туртки бўлди. Карьерамнинг энг гуллаб-яшнаган чоғида аввалги қилган ишимга қайтишни хоҳламадим», − дейди Жессика.
Жессика она бўлганидан сўнг «янада кўпроқ» нарса қилиши кераклигини тан олди. Шунинг учун ҳам у карьерасига эътибор қаратиш ўрнига ишбилармон аёл бўлишга қарор қилди. Натижада 2012 йилда The Honest Company’га асос солди. Компания экологик тоза, кимёвий моддаларсиз болалар маҳсулотини ишлаб чиқаришга ихтисослашган.
«Бренд яратиш ва бизнес қилиш жуда қийин. Шунингдек, унинг гуллаб-яшнаши ва кенгайиши бундан ҳам мушкул. Шерик топиш учун менга уч ярим йил керак бўлди ва мен бир неча маротаба рад жавоблар олдим. Мен ҳар бир босқичда ривожланиб боришни яхши кўраман ва бу таниқли бренд номини қадоқлаш ҳамда янги тўплам тақдим этишдан кўра кўпроқ кўникмаларни талаб этади», − дейди тадбиркор.
Мавзуга доир:
Изоҳ (0)