Қўқон шаҳрида қалбаки 100 долларлик купюра тайёрлаб, уни муомалага киритмоқчи бўлган шахс ушланди. Бу ҳақда «Дарё»га вилоят ИИБ ахборот хизмати хабар берди.
Маълум қилинишича, 2021 йилнинг 14 март куни Қўқон шаҳрида номаълум шахс савдо дўконига кириб, умумий нархи 110 минг сўмлик спиртли ичимлик ва бошқа турдаги маҳсулотларни харид қилган.
Савдогарга қалбаки усулда тайёрланган 100 долларни бериб, 935 минг сўмни қайтим сифатида олиб, ҳодиса жойидан яширинган. Бу ҳақда дўкон эгаси ИИБга ариза билан мурожаат қилган.
Ўтказилган судга оид техник-криминалистик экспертизанинг хулосасига кўра, 1 дона 100 доллар қийматидаги купюра қалбаки усулда рангли принтер ёрдамида тайёрланганлиги аниқланган.
Мазкур ҳолат юзасидан Қўқон шаҳар ИИО ФМБ ҳузуридаги тергов бўлими томонидан Жиноят кодексининг 176-моддаси 1-қисми (қалбаки пул, акциз маркаси ёки қимматли қоғозлар ясаш, уларни ўтказиш) билан жиноят иши қўзғатилган.
Олиб борилган терговга қадар текширув давомида қалбаки купюра Ю.М. томонидан тайёрланганлиги аниқланиб, унга нисбатан суд томонидан қамоққа олиш тарзидаги эҳтиёт чораси қўлланилган.
Изоҳ (0)