Самарқанд вилояти Ургут туманида Янги йил байрами куни маст ҳолда хотинини ўлдирган эркакка суд ҳукми ўқилди, дея хабар бермоқда ЎзА.
Қайд этилишича, Ургут тумани «Оқмачит» маҳалласида яшовчи, 1985 йилда туғилган К.О. 2021 йил 1 январь куни соат 16:30 да ўзининг яшаш хонадонида спиртли ичимлик истеъмол қилиб, маст ҳолда турмуш ўртоғи С.К. билан тортишиб қолади ва оқибатда уни бўғиб, ўлдириб қўяди.
Жиноят ишлари бўйича Ургут туман судининг ўтказилган очиқ суд мажлисида ушбу жиноят иши кўриб чиқилди. Судья А.А.нинг раислигида ўтган судда Жиноят кодексининг 97-моддаси 1-қисми (қасддан одам ўлдириш) билан айбланган К.О.га 11 йил муддатга озодликдан маҳрум қилиш жазоси тайинланди.
Таъкидланишича, эр-хотиннинг уч нафар вояга етмаган фарзанди бўлган.
Бундан аввал Андижонда қўшниси билан жанжаллашиб қолиб, уни ўлдирган шахс 16 ярим йилга қамалгани, Фарғонада эр Туркияга кетмоқчи бўлган хотинини рашк сабаб ўлдириб қўйгани ҳамда Навоийда маст фуқаро уйига келган меҳмонни пичоқлаб ўлдиргани ҳақида хабар берилганди
Изоҳ (0)