Қорақалпоғистонда болалар уйда ёлғизлигидан фойдаланиб, уларни алдаб тунда хонадонга кириб, талончилик содир этган шахслар ушланди, дея хабар бермоқда Тергов департаменти.
Маълум қилинишича, 2021 йилнинг 8 март куни тунги соат 03:30 ларда номаълум шахслар Нукус шаҳар 22-кичик туманида яшовчи 40 ёшли М.К.нинг яшаш хонадонида вояга етмаган 11 ёшли Қ.К. ва 7 ёшли А.К. уйда ёлғиз ўтирганликларидан фойдаланиб, уларга «онангиз пицца бериб юборди» деб, хонадон эшигини очтирган.
Уч нафар шахс болаларнинг қаршиликларига қарамасдан ушбу хонадонга ғайриқонуний равишда кириб, жами 25 000 000 сўмлик тилла тақинчоқларни талончилик йўли билан қўлга киритиб, ҳодиса жойидан яширинган.
Олиб борилган терговга қадар текширув ҳаракатлари давомида ушбу жиноятни Самарқанд вилоятидан Нукус шаҳрига ишлаш мақсадида келган фуқаролар 25 ёшли Ш.Ш., 22 ёшли О.Б. ва 24 ёшли Ш.А. содир этгани аниқланган.
Мазкур ҳолат юзасидан Нукус шаҳар ИИО ФМБ ҳузуридаги тергов бўлинмаси томонидан Ш.Ш., О.Б. ва Ш.А.га нисбатан Жиноят кодексининг 166-моддаси 3-қисми «б» (уй-жойга ғайриқонуний равишда кириб, содир этилган талончилик) банди билан жиноят иши қўзғатилиб, процессуал тартибда ушланган. Ҳозирда тергов давом этмоқда.
Маълумот учун, бу турдаги жиноятлар учун Жиноят кодексининг нормаларига кўра, 5 йилдан 10 йилгача озодликдан маҳрум қилиш жазоси тайинланади.
Аввалроқ Фарғонада Наврўз байрамида талончилик содир этган шахслар ушлангани, Самарқандда болға билан ота-болани ўлдириб, уларнинг уйини талон-торож қилган эркак 22 йилга қамалгани ҳамда Юнусободдаги кафедан ичида 15 миллион сўм бўлган сейфни ўғирламоқчи бўлган шахс воқеа жойида қўлга олингани ҳақида хабар берилганди.
Изоҳ (0)