Йўлтанламасларни қайта ишлашга ихтисослашган Американинг Apocalypse Manufacturing компанияси Apocalypse Hellfire номи остидаги экстремал Jeep’ни тақдим этди. Олти ғилдиракли автомобилга 750 от кучига эга мотор ўрнатилган бўлиб, у 199 900 минг долларга сотилмоқда, деб хабар беради Motor.
Apocalypse Hellfire базасини Gladiator пикапи ташкил этади, бироқ сотувчи сайтда моделга аниқлик киритмаган. Учинчи ўқ ва 40 дюймли ғилдираклардан ташқари автомобиль сезиларли даражада қайта ишланган янги панеллар ҳамда пўлат бамперли экстерьерга эга бўлган. Шунингдек, иккита ёруғлик диодли «қандиллар» ҳам бор — фаралар ўртасида ва олд ойна остида.
Бундан ташқари, машинада иккита кучли чиғир ҳам мавжуд: олд қисмидагиси 4309 килограммли юкни тортишга, орқадагиси — 5443 килограммга мўлжалланган. Jeep электр узатмали силжийдиган оёққўйгич ва ечиладиган эшиклар билан жиҳозланган. Машина салони табиий чарм билан қопланган, навигатор, сифатли аудиотизим ва двигателни ишга тушириш тугмаси бор. Шунингдек, жамланмадан орқани кўришга мўлжалланган камера ҳам ўрин олган.
Мазкур Jeep 750 от кучини тақдим этишга қодир 6,2 литрли Hellcat V8 мотори ёрдамида ишлайди ва саккиз поғонали автомат узатмалар қутиси ёрдамида бошқарилади.
Аввалроқ АҚШда жуда узун ва ғалати Jeep Wrangler аукционга қўйилгани тўғрисида хабар берилганди.
Изоҳ (0)