Тошкент вилоятининг Қибрай туманида қарздор эрдан унинг аёли фойдасига компенсация пуллари ундириб берилди. Бу ҳақда МИБ матбуот хизмати «Дарё»га хабар берди.
МИБ Қибрай туман бўлими иш юритувига Фуқаролик ишлари бўйича Тошкент вилояти Чирчиқ туманлараро судининг 19 февралдаги ижро варақасига асосан, қарздор эр С.Д.дан ундирувчи аёл М.Д. фойдасига Spark русумли автомашинадаги аёлга тегишли бўлган тенг ярим улуш, яъни 32 миллион 775 минг сўм компенсация пуллари ундириш тўғрисидаги ижро ҳужжати 23 март куни келиб тушган.
Мазкур ижро ҳужжати ижро иши юритишни қўзғатиш тўғрисида қарор қабул қилиниб, қарор нусхалари тарафларга юборилган. Ижро ҳаракатлари давомида қарздорга тегишли бўлган Spark русумли автомашина 23 март куни хатланиб, тегишли тартибда холислар иштирокида далолатнома расмийлаштирилган.
Олиб борилган мажбурий ижро ҳаракатлари давомида шу куни қарздордан 32 миллион 775 минг сўм компенсация пуллари ундирувчига тилхат асосида ундириб берилган.
Аввалроқ Бухорода 100 ой давомида алимент тўлашдан бўйин товлаб, қочиб юрган ота 15 суткага қамалгани, самарқандлик ота фарзандлари таъминоти учун 246 миллион сўм алимент пулини олдиндан тўлаб бергани, фарғоналик ота уч фарзандининг алимент пули ўрнига уй ҳадя қилгани, Бухорода алиментдан қарздор ота фарзандларига машина ва икки хонали квартира бергани ҳақида хабар берилган эди.
Изоҳ (0)