Фуқароларни Россияга жўнатиш учун сохта авиачипталар тайёрлаб бериб, фуқаронинг пулларини фирибгарлик йўли билан қўлга киритган шахсларга нисбатан жиноят иши қўзғатилди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Департаментнинг Бухоро шаҳар бўлими томонидан ўтказилган терговга қадар текширувда С.С. ва С.Р. олдиндан тил бириктириб, фуқароларни алдаб, Россия ҳудудига киришга рухсат этувчи ҳужжатларни танишлари орқали олиб беришга ишонтирган. Эвазига ҳар биридан 1300 доллар олиб, Бухоро—Жуковский чартер авиарейсига сохта чипталарни тайёрлаб бериб, жами 17 нафар фуқаронинг 22 100 долларини фирибгарлик йўли билан қўлга киритган.
Ҳолат юзасидан С.С. ва С.Р.га нисбатан Жиноят кодексининг 168-моддаси (фирибгарлик), 28, 211-моддаси (пора бериш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
Изоҳ (0)