Фарғона вилоятининг Бағдод туманида 330 ўринли янги мактаб фойдаланишга топширилди. Бу ҳақда хабар берган «Дарё» мухбири Азизжон Эрматовнинг ёзишича, лойиҳа қиймати 4,5 миллиард сўм бўлган мактаб ҳудудда яшовчи аҳоли, тадбиркор ва фермерлар томонидан ҳашар йўли билан қуриб битказилган.
Таъкидланишича, шу кунга қадар туманнинг энг чекка ҳудуди ҳисобланган Меҳнатобод қишлоғида умумий ўрта таълим мактаби бўлмаган. Қишлоқ ёшлари эски дала шийпони ўрнида — мослаштирилган бинода бошланғич таълимни олган. Юқори синфларда ўқиш учун эса ҳар куни 4-5 километр масофа пиёда юриб, қўшни қишлоқдаги мактабга қатнаган.
Аҳоли, тадбиркор ва фермерлар томонидан ҳашар йўли билан қурилган мактабни жиҳозлаш учун туман ҳокимлиги томонидан 750 миллион сўм маблағ ажратилган ва мактаб жиҳозланган.
Тантанали очилиш маросимида иштирок этган Фарғона вилояти ҳокими Хайрулла Бозоров янги мактаб учун компьютер синфи, замонавий мусиқа ва спорт анжомларини топширган. Шунингдек, вилоят ҳокимлиги томонидан мактаб учун замонавий спорт зали қуриб берилишини маълум қилган.
Мавзуга доир:
- «Мактаб ‘аварийнийънинг ‘аварийний’ ҳолатида». Депутат Томди туманидаги қулаб тушмаслик учун темир билан «чирмаб» қўйилган мактаб ҳақида
- «Пахса деворли ҳужрада 96 нафар ўқувчи ўқийди». Чироқчиликлар мактаб филиаллари талабга жавоб бермаслигидан шикоят қилмоқда
- Қашқадарёда 1972 йилда қурилган шийпон мактабда ўқиётган ўқувчилар илон ёки чаён чақишидан чўчимоқда
Изоҳ (0)