Тошкентнинг «Локомотив» клуби собиқ устози Андрей Фёдоров «Локомотив-Казанка» бом мураббийга айланди.
Эндиликда ўзбекистонлик мутахассис «Локомотив»нинг фарм-клуби ҳисобланган «Казанка»ни бошқаради. Бу ҳақда «темир йўлчилар» матбуот хизмати маълум қилди.
Фёдоров ушбу лавозимда Илшат Файзуллиннинг ўрнини эгаллайди. Аввалроқ Фёдоров жамоада селексионер мураббий сифатида ишлаётганди.
«Казанка» айни вақтда Россиянинг учинчи дивизиони ҳисобланган ПФЛда ҳаракат қилади. 16-турдан кейин жамоа 16 жамоадан иборат гуруҳда 8-ўринда бормоқда.
Андрей Фёдоров — 1971 йилнинг 10 апрелида Марғилон шаҳрида туғилган. Футболчилик фаолияти мобайнида «Қўқон-1912» (собиқ «Автомобильчи»), «Нефтчи», «Алания», «Балтика» ва «Рубин» клубларида тўп сурган. Шунингдек, 1994—2006 йиллар давомида Ўзбекистон терма жамоасида ҳаракат қилган.
Мураббийлик фаолияти даврида «Рубин», «Нефтчи» ва «Локомотив Тошкент»да ишлаган. Унинг қўл остидаги «Локомотив» 2018 йилда Ўзбекистон чемпионатида ғолиб бўлган ва 2019 йилда мамлакат Суперкубогини қўлга киритганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)