Европа Иттифоқидан сўнг, АҚШ, Канада ва Буюк Британия Шинжон-Уйғур мухтор вилоятидаги уйғурлар ҳуқуқларини бузгани учун Хитой расмийларига қарши санкциялар киритди. Бу ҳақда «Korrespondent.net» хабар берди.
Лондон тўрт нафар хитойлик мансабдор ва битта ташкилотга санкция жорий қилди. Бу рўйхатга Синсзяннинг жамоат хавфсизлиги бошқармаси раҳбари Чен Минго, партия қўмитаси аъзоси, Синсзяннинг сиёсий-ҳуқуқий комиссияси раҳбари Ван Миншан, Синсзян-Уйғур автоном вилояти (СУАР) партия қўмитаси котибининг ўринбосари Ван Сзюнчжен, шунингдек, Халқ Конгресси Доимий қўмитаси раисининг ўринбосари Чжу Хайлун киритилган. Санкциялар Синсзян қурилиш ва ишлаб чиқариш корпусига ҳам киритилди.
Бу каби санкциялар Канада томонидан ҳам киритилди, АҚШнинг «қора» рўйхатига эса икки нафар хитойлик мансабдор кирди.
«Бугунги кунда Молия вазирлигининг ҳаракатлари буларга қарши санкциялар қўллаган Европа Иттифоқи, Буюк Британия ва Канада томонидан амалга оширилган ишларни тўлдиради», — деб хабар берди АҚШ Молия вазирлиги.
Хусусан, АҚШ Хитойдаги Шинжон қурилиш ва ишлаб чиқариш корпуси билан боғлиқ компаниялардан пахта ҳамда текстиль маҳсулотларининг импортига тақиқ қўйди.
АҚШ санкциялари Магницкий номидаги инсон ҳуқуқлари тўғрисидаги глобал қонуни доирасида киритилди.
Белгиланган санкциялар рўйхатга киритилган шахсларнинг ушбу давлатлар ҳудудида барча мулки ёки мулкий ҳуқуқларини чеклашни назарда тутади. Шунингдек, Қўшма Штатларнинг жисмоний ва юридик шахсларига рўйхатдагилар билан ҳар қандай битимлар тузиш тақиқланади.
Аввал хабар берилганидек, Хитой Евроиттифоқнинг санкцияларига жавобан 10 нафар жисмоний ва тўртта юридик шахсга нисбатан чеклов чораларини кўрди.
Евроиттифоқ дипломатияси раҳбари Жозеп Боррел Хитойнинг бу қарорини қоралади. «Ушбу чоралар одамни афсуслантиради ва номақбул ҳисобланади. Евроиттифоқ инсон ҳуқуқларини ҳимоя қилиш йўлидан қайтмайди», — деди у.
Маълумки, Хитой расмийлари Синсзяндаги уйғурларга нисбатан репрессияда айбланмоқда. Январь ойида АҚШ Хитойнинг уйғурларга қарши ҳаракатини геноцид деб атаган биринчи давлат бўлди. Пекин барча айбловларни рад этмоқда.
Туркия ТИВ расмий вакили Ҳамид Оқсой расмий Пекинни қамоқхоналар ва лагерларда уйғурларга нисбатан қийноқ қўллашда айблади. Унинг сўзларига қараганда, «қамоқхона ва лагерларда миллиондан ортиқ уйғур мажбурий тутиш, қийноқ ва идеологик ишлаш сиёсатига дуч келган».
Шунингдек, интернетда Хитойнинг шимоли-ғарбий қисмида жойлашган Шинжон-Уйғур мухтор туманида қарийб 2,6 миллион уйғурларнинг ҳаракатланиши кузатилаётгани аниқланган. Ахборот хавфсизлигига ихтисослашган GDI Foundation нотижорат ташкилоти ходими Виктор Геверс Интернетдан оммавий маълумотлар базасини топганлигини маълум қилган. Олти ой давомида маълумотлар базасига кириш очиқ бўлган. Унинг очиқлиги сервер эгаларига маълум қилингач унга кириш ёпилган.
Изоҳ (0)