АҚШ ва Россия муҳим масалаларда келишмовчиликларга учраётгани туфайли, уларнинг ўзаро муносабатларини олдинда «оғир кунлар» кутмоқда. Бу ҳақда АҚШ президентининг миллий хавфсизлик бўйича маслаҳатчиси Жей Салливан MSNBC телеканалига берган интервьюсида айтиб ўтди, деб ёзади Meduza.
«Бизнинг фикримизча, Россия билан муносабатларда қийин кунлар кутиб турибди, чунки ўртада чуқур келишмовчиликлар ҳамда қатъий жавоб қайтаришимизга мажбур қилаётган ҳаракатлар мавжуд. Шу билан бирга, Россия билан муҳим соҳаларда, шу жумладан, бир неча ҳафта олдин беш йилга узайтирилган янги «Стратегик ҳужум қуроллари тўғрисида Россия—Америка шартномаси» билан ядровий соҳада ҳамкорлик қилишимиз мумкинлигига ишонамиз», — деди Салливан.
Шунингдек, суҳбат чоғида Салливандан Жо Байденнинг Россия президенти Владимир Путинни қотил деб атаган баёноти тўғрими ёки йўқлигини сўрашди. Салливаннинг айтишича, Байденнинг сўзлари тўғридан-тўғри саволга тўғридан-тўғри жавоб бўлган.
Аввалроқ АҚШ президенти Жо Байден ABC телеканалига берган интервьюсида журналистнинг «Россия президенти Владимир Путинни қотил деб ҳисоблайсизми?» — деган саволига тасдиқ жавобини берди. «Ммм, ҳмм, ҳа», — дея жавоб қилди Байден ундан интервью олаётган Жорж Стефанополуснинг саволига.
Кремль эса Жо Байденнинг Владимир Путин ҳақидаги баёнотларини «жуда ёмон» деб ҳисоблашини айтди. Бу ҳақда Россия президентининг матбуот котиби Дмитрий Песков журналистларга берган интервьюсида айтиб ўтди.
Ўз навбатида, Путин АҚШ давлат раҳбари Жо Байденга тўғридан-тўғри эфир орқали мулоқот қилишни таклиф этди. АҚШ президенти Жо Байден Россия президенти Владимир Путин уни таклиф қилган очиқ муҳокамага розилик бериш-бермаслиги ҳақидаги саволни эътиборсиз қолдирди.
Изоҳ (0)