Туркманистон бўйлаб 20 март куни баҳорги кўкаламзорлаштириш ҳашари ўтказилди. Ашхободдаги ҳашарда президент Гурбангули Бердимуҳамедов ҳам иштирок этди. Бу ҳақда Туркманистон давлат ахборот агентлигига таяниб, «Хроника Туркменистана» хабар берди.
20 март куни эрталаб давлат раҳбари машинада Гарагум меҳмонхонаси ёнидаги боғга етиб келди, уни Мажлис раиси, бош вазир ўринбосарлари, ҳарбий ва ҳуқуқни муҳофаза қилиш органларининг ҳамда вазирлик ва давлат идораларининг раҳбарлари кутиб олди.
Президент 16 март куни меҳмонхона ва унга туташ боғнинг қурилиш ишларини кўздан кечирган эди.
Меҳмонхона ёнида давлат мадҳияси садолари остида давлат байроғи кўтарилди ва Бердимуҳамедов дарахт экди. Ундан ўрнак олиб барча расмийлар ва хавфсизлик хизмати ходимлари ҳам кўчат ўтқазди.
Маълумот учун, 12 февраль куни президент мустақилликнинг 30 йиллиги шарафига бу йил 30 миллион туп кўчат ўтқазишни буюрган: уларнинг 10 миллионтаси Ашхободда, 20 миллионтаси вилоятларда экилади.
Шанба куни республиканинг барча ҳудудларида тозалаш ишлари ўтказилди. Уларда давлат ва бюджет ташкилотлари ходимлари сўзсиз иштирок этди, деб хабар беради «Хроника Туркменистана» мухбирлари. Одамлар чиқиндиларни тозалаб, дарахт экиш билан шуғулланган.
Аввалроқ Бердимуҳамедов фавқулодда вазиятлар учун 112 ёки 911 ягона рақамидан фойдаланишни таклиф қилган эди.
Шунингдек, Туркманистон парламенти «Хизмат кўрсатган итбоқар» ва «Халқ итбоқари» фахрий унвонларини таъсис этиш тўғрисидаги қонун лойиҳаларини қабул қилгани ҳақида хабар берилганди. Туркманистон президенти Гурбангули Бердимуҳамедов ушбу фахрий унвонлар совриндорлари учун кўкрак нишонларининг эскизларини шахсан тасдиқлаган.
Эслатиб ўтамиз, Бердимуҳамедов Туркманистон пойтахтининг юбилейи куни туғилган биринчи чақалоққа Ашхобод деб исм қўйишни буюрган. Шунингдек, у театрларда «халқнинг бахтли ҳаёти» тўғрисидаги спектакллар йўқлиги сабаб маданият вазирига ҳайфсан берган.
Изоҳ (0)