Yevropa Ittifoqi mamlakatlarining diplomatlari bir qator davlatlarga, xususan, Rossiya va Xitoyga nisbatan inson huquqlarini buzganlik uchun yangi sanksiyalarni ma’qulladi. Bu haqda “Korrespondent.net” xabar berdi.
Foto: Global Look Press
Qayd etish joizki, bu Yevropa Ittifoqining 1989-yildagi qurol-aslaha embargosidan keyin Pekinga qarshi birinchi sanksiyalari hisoblanadi.
“Yevropa Ittifoqi elchilari inson huquqlari bo‘yicha navbatdagi sanksiyalar guruhiga ‘yashil chiroq’ni yoqdi. Bu safar Xitoy, Eritreya, Liviya, Shimoliy Koreya, Rossiya va Janubiy Sudandan 11 kishi va to‘rt tashkilotga nisbatan cheklov qo‘yildi”, — deyiladi xabarda.
Ta’kidlanishicha, qarorlar 22-mart, dushanba kuni e’lon qilinishi kerak. Xabarga ko‘ra, ro‘yxatdagi ikki rossiyalik Chechenistonda “geylarni tozalash”da ayblanmoqda.
Reuters’ning xabar berishicha, elchilar, shuningdek, to‘rt nafar xitoylik uchun safar qilishni taqiqlab, aktivlarini muzlatishni hamda bitta Xitoy tashkilotiga qarshi sanksiyalarni ma’qulladi.
“Cheklov choralari inson huquqlarining jiddiy buzilishi sabab qabul qilindi”, — dedi Yevropa Ittifoqi diplomatlaridan biri. Xitoy rasmiylari Xitoydagi uyg‘ur musulmon ozchiligiga qarshi inson huquqlarini buzishda ayblanmoqda. Ushbu harakat Yevropa, AQSh va Kanadadagi uyg‘urlarning ahvoliga nisbatan chuqur tashvishlarni aks ettiradi, deydi diplomatlar.
Avvalroq Yevroittifoq Venesuela diplomatik vakolatxonasi rahbarini o‘z hududidan chiqarib yuborgani haqida xabar berilgandi. Bunga sabab qilib respublikaning hamjamiyat vakiliga nisbatan xuddi shunday munosabatda bo‘lgani ko‘rsatilgan. Shuningdek, Yevroittifoq va AQSh Navalniy ishi yuzasidan Rossiyaga qarshi sanksiyalar kiritdi.
