Наманган вилояти делегацияси Наврўз байрами арафасида Қирғизистоннинг Жалолобод вилоятида бўлди. Бу ҳақда «Дарё» мухбири Азизбек Абдувалиев хабар бермоқда.
Ҳокимлик, туризм ва ишбилармон доиралар вакилларидан иборат делегация аъзоларини Қирғизистон ҳукуматининг Жалолобод вилоятидаги ваколатли вакили Абдусаттор Сирғабоев қабул қилди.
Ўзаро музокаралар давомида икки вилоят ўртасида ҳамкорлик алоқаларини янада мустаҳкамлаш ҳақида сўз борди. Наманган ва Жалолободнинг инвестиция салоҳияти, қўшма корхоналар ташкил этиш борасидаги имкониятларига тўхталиб ўтилди.
Ваколатли вакилга Наманган вилояти ҳокимининг эсдалик совғалари топширилди.
Шундан сўнг Наманган вилояти делегацияси Жалолободда қўшма лойиҳаларни амалга ошириш учун таклиф этилаётган корхоналар билан танишди. Жумладан, Хитой, Россия ва Қозоғистонга экспорт қилинаётган «Келечек» минерал сувлари ишлаб чиқариладиган шу номли акциядорлик жамияти, травертин маҳсулотлари тайёрланадиган «Таш-Курулуш» МЧЖ, қарийб 40 гектар майдонни эгаллаган «Жалолобод» сиҳатгоҳи, Новкент туманидаги логистика маркази учун мўлжалланган бинолар кўрилди.
Новкентда қишлоқ фаоллари ва оқсоқоллари билан мулоқот ўтказилди. Учрашувда нуронийлар ҳар икки вилоят ўртасидаги дўстлик алоқаларини мустаҳкамлаш бўйича олиб борилаётган ишларга муваффақият тилаб, дуо қилишди.
Наманган делегацияси сафари яқин орада очилиши кутилаётган «Учқўрғон—Кентсай» чегара пунктини кўздан кечириш билан якунланди.
Изоҳ (0)