Фарғона вилоятининг Ўзбекистон туманида Наврўз байрами муносабати билан 30 нафар эҳтиёжманд боланинг хатна тўйи ўтказиб берилди. Бу ҳақда тадбирда иштирок этган «Дарё» мухбири Азизжон Эрматов хабар берди.
Таъкидланишича, Ўзбекистон туманидаги «Роҳат» тантаналар мажмуасида ўтказилган Наврўз байрамида «аёллар дафтари»га киритилган оилаларнинг 30 нафар фарзандининг хатна тўйи ўтказиб берилган.
Туман ҳокимлиги, жамоат ташкилотлари ҳамкорлигида ўтказилган тўйда болаларнинг ота-оналари, яқин қариндошлари ҳамда дўстлари иштирок этган. Шунингдек, тўйда эҳтиёжманд оилаларнинг 200 нафардан ортиқ фарзандлари меҳмон бўлган. Тўйда болаларга сарполар кийдирилиб, ҳомий ташкилотларнинг велосипед, телевизор каби қимматбаҳо совғалари топширилган.
«Бугун ўғлим Орифжоннинг суннат тўйи бўлди. Ўғлим ўтган йили мактабга чиққанди. Қўлим калталиги учун синфдошларини чақириб, тўй қилиб бера олмаётган эдим. Бугун шу ниятим амалга ошди. Эҳтиёжманд оилаларга, айниқса, фарзандларимизга кўрсатилаётган ғамхўрликдан бошимиз кўкка етди. Бунинг учун давлатимиздан, барча саховатли инсонлардан беҳад миннатдормиз», — деди Ўзбекистон туманининг «Қум» маҳалласида яшовчи Зулхумор Деҳқонова.
Изоҳ (0)