Тошкентнинг Чилонзор, Шайхонтоҳур, Олмазор ва Учтепа туманларидаги хонадонларга берилган иссиқлик даражаси пастлиги сабаб 85 272 та абонент тўлаган маблағ қайта ҳисоб-китоб қилинди, дея хабар бермоқда Истеъмолчилар ҳуқуқларини ҳимоя қилиш агентлиги.
Қайд этилишича, агентликка келиб тушган аризалар асосида олиб борилган ўрганишлар натижасида Тошкент шаҳрининг Чилонзор, Шайхонтоҳур, Олмазор ва Учтепа туманларига хизмат кўрсатувчи иссиқлик қозонхоналаридан етказиб берилган иссиқлик даражаси белгиланган меъёрдан пастлиги аниқланган.
Агентлик ўзининг ўрганишлари натижасини далолатномада акс эттириб, «Тошиссиққуввати»га кўрсатилмаган хизмат учун тўловларни қайта ҳисоблаш тўғрисида, шунингдек, бошқа қонунбузарликларнинг олдини олиш учун зарур чораларни кўриш бўйича кўрсатма берди.
«Бугунги кунга қадар берилган кўрсатма доирасида ‘Тошиссиққуввати’ ДУК томонидан мазкур тўртта туманнинг 85 272 та абонентига 2020 йил ноябрь–декабрь ойлари учун 8,1 млрд сўмдан ортиқ маблағ қайта ҳисоб-китоб қилинишига эришилди.
Истеъмолчиларнинг абонент ҳисобрақамига маблағларини қайта ҳисоблаш жараёни давом эттирилмоқда», – дейилади агентлик хабарида.
Бундан аввал Тошкент вилоятида ўчиб қолган газ ҳисоблагичларни ўрнатиш вақтида далолатномалар нотўғри расмийлаштирилгани аниқлангани ҳамда Самарқандда аҳоли хонадонларида 30 дан ортиқ газ тортиш қурилмаси ноқонуний ўрнатилгани маълум бўлгани ҳақида хабар берилганди.
Изоҳ (0)