Namangan hokimi Jalolobod viloyati rahbariga Navro‘zni birga nishonlashni taklif qildi

Namangan viloyati hokimi Shavkat Abdurazzoqov Qirg‘iziston hukumatining Jalolobod viloyatidagi vakolatli vakili Abdusattor Sirgabayev bilan videomuloqotda bo‘ldi. Bu haqda “Daryo” muxbiri Azizbek Abduvaliyev xabar bermoqda.

Muloqot davomida ikki viloyat o‘rtasidagi hamkorlikning bugungi holati va kelgusidagi istiqbollari muhokama qilindi. O‘zaro aloqalarni mustahkamlashga qaratilgan “Yo‘l xaritasi” ko‘rib chiqildi.

Shavkat Abdurazzoqov qishloq xo‘jaligi, chorvachilik, sanoat va tekstil sohalaridagi hamkorlikka alohida urg‘u berdi. 2021-yil mart oyida, Navro‘z bayrami kunlari Namanganda ikki viloyat tadbirkorlarining biznes-forumini o‘tkazishni taklif qildi.

— Namanganda Navro‘z  kunlari 6 tonnalik sumalak tayyorlanadi, uloq-ko‘pkari o‘tkaziladi. Siz boshchiligingizdagi delegatsiyani aziz mehmonlarimiz qatori kutib olishga tayyormiz. Bayramni birgalikda nishonlaymiz, — dedi Shavkat Abdurazzoqov.

Ushbu taklif vakolatli vakil tomonidan mamnuniyat bilan qabul qilindi.

O‘z navbatida, Abdusattor Sirgabayev “Namangan—Jalolobod” yo‘nalishida transport qatnovini yo‘lga qo‘yish, ko‘mir ishlab chiqarish bo‘yicha qo‘shma korxona ochish, Jalolobod viloyatining Safed-Bulon, Sarichelak, Arslonbob kabi turistik manzillariga namanganlik sayyohlarni jalb etish bo‘yicha takliflarini ilgari surdi.

Ikki viloyat rahbarlari Qirg‘iziston prezidenti Sadir Japarovning O‘zbekistonga bo‘lajak tashrifi arafasida o‘zaro aloqalarning barcha jihatlarini yana bir bor ko‘rib chiqishga kelishib oldi.