Самарқандда қизининг шаънини булғовчи гап-сўзларни тарқатган эркакни калтаклаган ота ва унинг укасига нисбатан жиноят иши қўзғатилди, деб хабар беради Тергов департаменти.
Маълум қилинишича, 2 март куни соат 21:00 ларда 43 ёшли Ғафур С. укаси билан Ургут туманида жойлашган «Korzinka.uz» савдо маркази олдида 29 ёшли Ҳасан Ў.ни олдиндан давом этиб келаётган келишмовчилик сабаб танасининг турли жойларига уриб, жароҳат етказган.
Суд тиббий экспертиза хулосасида Ҳасан Ў.да оғир тан жароҳатлари аниқлангани кўрсатилган.
Олиб борилган терговга қадар текширув ҳаракатлари давомида Ҳасан Ў. Ғафур С.нинг турмушга чиқмаган қизининг шаънини булғаш мақсадида гап-сўз тарқатиб юрганлиги сабабли ушбу жиноят содир бўлгани аниқланган.
Мазкур ҳолат юзасидан Ургут тумани бўйича ИИО ФМБ ҳузуридаги Тергов бўлими томонидан Ғафур С. ва унинг укасига нисбатан Жиноят кодексининг 104-моддаси 2-қисми «к,л» бандлари (қасддан баданга оғир шикаст етказиш) билан жиноят иши қўзғатилган.
Ҳозирда тергов ҳаракатлари олиб борилмоқда.
Маълумот учун, бу турдаги жиноятларга Жиноят кодексининг нормаларига кўра, беш йилдан саккиз йилгача озодликдан маҳрум қилиш жазоси тайинланади.
Аввалроқ фарғоналик тадбиркор телефонда қизи билан ёзишган 14 ёшли ўқувчини калтаклагани тўғрисида хабар берилганди.
Изоҳ (0)