Шоколад ва қорағатли қуймоқ рецепти

Нонуштага ноодатий қуймоқ тайёрлаб, оила аъзоларингизни хурсанд қилинг.

Керакли маҳсулотлар:

• ун —150 грамм;
• какао — 2 ош қошиқ;
• шакар — 1 чой қошиқ;
• разрихлитель — 1 пакет;
• тухум — 1 та;
• сут — 350 грамм;
• сариёғ — 40 грамм;
• қорағат — 200 грамм;
• маккажўхори крахмали — 1 ош қошиқ;
• сметана — 200 грамм;
• шакар кукуни — 1 ош қошиқ;
• долчин — 1 чой қошиқ.

1. чуқурроқ идишга ун, какао, разрихлитель, шакар солиб аралаштиринг;
2. ун ўртасини чуқир қилиб, унга тухум чақинг;
3. устидан сут, эритилган сариёғни қуйиб, қуймоқ хамирини тайёрланг. Аралашма устини ёпиб, 10 дақиқага тиндиринг;
4. ёғланган товани қиздириб, хамирни қуйинг. Икки томанини қизартириб пиширинг;
5. пишган қуймоқларга сариёғ суртиб, ликопчага тахланг;
6. қорағатли соус тайёрлаш учун меваларга 1-2 ош қошиқ шакар, крахмал солиб, яхшилаб аралаштиринг. Ўрта оловда қуюлгунча қайнатинг;
7. сметанага шакар кукуни, долчин қўшиб, соус тайёрланг;
8. дастурхонга қуймоқларни мевали ва сметанали соус билан тортинг.