Қашқадарё вилоятининг Қарши шаҳрида кучли шамол эсиб, шаҳар кўчаларига қум ёғилди, дея хабар берди «Дарё» мухбири.
Маълум бўлишича, бугун, 19 март куни Қашқадарё вилоятида кучли шамол эсиб, аксарият жойларда қуюн турган.
«Шу даражада кучли шамол эсдики, ҳатто Қарши шаҳрида дарахт ҳам қулаб тушди. Йўлни тўсиб қўйган дарахт сабаб автомобиллар ҳаракатида ноқулайлик туғилди. Кўзни очиб бўлмай қолди, шаҳар кўчалари оппоқ чанг бўлиб кетди», — дейди «Дарё» мухбири билан суҳбатлашган йўловчи.
«Дарё» мухбирининг аниқлаштиришича, қум аралаш шамол эсиши вилоятнинг Деҳқонобод, Ғузор, Миришкор ва Муборак туманларида ҳам содир бўлган.
Эслатиб ўтамиз, аввалроқ ФВВ Ўзбекистоннинг айрим ҳудудларида 18—20 март кунлари кучли шамол бўлишидан огоҳлантирганди. Вазирлик матбуот хизмати шамол тезлиги 17-22 метр/секунддан 23-28 метр/секундгача кучайиши кутилаётганини маълум қилиб, фуқароларга кучли шамол вақтида заруратсиз ташқарига чиқмасликни, автомобиль эгаларига машиналарини дарахтлардан узоқроққа қўйишни тавсия этганди.
Изоҳ (0)