Гибралтар коронавирусга қарши вакцинацияни тугаллаган дунёдаги биринчи давлатга айланди. Бу ҳақда Буюк Британия соғлиқни сақлаш вазири Мэтт Хенкок маълум қилди, деб ёзади «Korrespondent.net».
«Биз Гибралтарни, бошқа барча ҳудудларимиз сингари, вакциналар билан таъминлаймиз. Мен парламентга Гибралтар вояга етган аҳоли учун вакцинация дастурини якунлаган дунёдаги биринчи мамлакат бўлгани ҳақида хабар беришдан хурсандман», — деди соғлиқни сақлаш вазири.
The Wahington Post нашрининг маълум қилишича, «Ватикан ҳам бу номга даъвогарлик қиляпти». Шунингдек, Гибралтар аҳолиси кўп бўлмаган мамлакат, бу эса вакцинацияни тезроқ якунлашга ёрдам берган. Бундан ташқари, давлат Буюк Британиянинг суверенитети бўлгани учун вакцинани осонликча қўлга киритди.
Испания билан баҳсларга сабаб бўлиб келаётган, Буюк Британиянинг денгизорти ҳудуди ҳисобланган Гибралтар аҳолиси тахминан 34 минг кишини ташкил қилади. У ерда яшовчи чет элликлар ҳам эмлаш дастурида қатнашиш ҳуқуқига эга.
Шунингдек, Буюк Британияда ҳам эмлаш жараёни сезиларли даражада олдинга силжиган, у ерда вояга етганларнинг деярли ярми вакцина олган.
Маълумот учун, Исроил коронавирусни енгиб ўтганини эълон қилган эди. Мамлакат ҳукумати март ойининг охирига қадар барча ёши катталарни COVID-19’га қарши эмлашни режалаштирмоқда.
Аввалроқ дунё бўйича аҳолини коронавирусга қарши эмлаш учун кенг кўламдаги ишлар давом этаётгани ва бу жараён 132 та давлатда олиб борилаётгани ҳамда ҳозиргача 400 миллиондан ортиқ вакцина ишлатилгани ҳақида хабар берилди. Охирги кўрсаткичга кўра, бир кун давомида жами 9,64 миллион доза вакцина қилинган.
Хитой ҳукумати эса фавқулодда вазиятларда фойдаланиш учун коронавирусга қарши тўртинчи вакцинасини тасдиқлади.
Изоҳ (0)