Бухоро туманида олти йил давомида алимент тўлашдан бўйин товлаб келган отадан МИБ ҳаракати билан 26 миллион 250 минг сўм ундирилди. Бу ҳақда «Дарё»га МИБ туман бўлими давлат ижрочиси Жаҳонгир Бобоқулов хабар берди.
Таъкидланишича, Фуқаролик ишлари бўйича Бухоро туманлараро судининг 2015 йил 7 августдаги қарорига кўра, фуқаро Х.Р.дан ундирувчи А.К. фойдасига бир нафар фарзанди таъминоти учун ойлик даромадининг 25 фоизи миқдорида алимент ундириш белгиланган. Бироқ фуқаро 2021 йилнинг март ойига қадар оталик мажбуриятини бажаришдан бўйин товлаб келган.
МИБ Бухоро туман бўлими томонидан фуқаро Х.Р. бир неча маротаба огоҳлантирилган. Алимент қарздорлигини ундириш юзасидан ҳужжатлар ўрганилганда Х.Р.нинг зиммасида фарзанди учун тўланиши керак бўлган 27 миллион 693 минг сўм қарздорлик мавжудлиги аниқланган. Шундан сўнг Х.Р. ушбу қарздорликни ундирувчи А.К. фойдасига 2500 доллар (26 миллион 250 сўм) қилиб тўлаб берган.
«Ойлик маоши етарли ва ўртача шароитда яшаб келаётган фуқаро Х.Р, имкони бўлишига қарамай, олти йил давомида фарзанди таъминотидан бўйин товлаб келган. Унинг ҳаракати Маъмурий жавобгарлик тўғрисидаги кодекс билан малакалангач, Х.Р.дан ундирувчи А.К. фойдасига 26 миллион 250 сўм ундириб берилди. Ота ўз қарздорлигини 2500 доллар ҳисобида тўлаб берди», — деди Жаҳонгир Бобоқулов.
Изоҳ (0)