Buxoro tumanida olti yil davomida aliment to‘lashdan bo‘yin tovlab kelgan otadan MIB harakati bilan 26 million 250 ming so‘m undirildi. Bu haqda “Daryo”ga MIB tuman bo‘limi davlat ijrochisi Jahongir Boboqulov xabar berdi.
Ta’kidlanishicha, Fuqarolik ishlari bo‘yicha Buxoro tumanlararo sudining 2015-yil 7-avgustdagi qaroriga ko‘ra, fuqaro X.R.dan undiruvchi A.K. foydasiga bir nafar farzandi ta’minoti uchun oylik daromadining 25 foizi miqdorida aliment undirish belgilangan. Biroq fuqaro 2021-yilning mart oyiga qadar otalik majburiyatini bajarishdan bo‘yin tovlab kelgan.
MIB Buxoro tuman bo‘limi tomonidan fuqaro X.R. bir necha marotaba ogohlantirilgan. Aliment qarzdorligini undirish yuzasidan hujjatlar o‘rganilganda X.R.ning zimmasida farzandi uchun to‘lanishi kerak bo‘lgan 27 million 693 ming so‘m qarzdorlik mavjudligi aniqlangan. Shundan so‘ng X.R. ushbu qarzdorlikni undiruvchi A.K. foydasiga 2500 dollar (26 million 250 so‘m) qilib to‘lab bergan.
“Oylik maoshi yetarli va o‘rtacha sharoitda yashab kelayotgan fuqaro X.R, imkoni bo‘lishiga qaramay, olti yil davomida farzandi ta’minotidan bo‘yin tovlab kelgan. Uning harakati Ma’muriy javobgarlik to‘g‘risidagi kodeks bilan malakalangach, X.R.dan undiruvchi A.K. foydasiga 26 million 250 so‘m undirib berildi. Ota o‘z qarzdorligini 2500 dollar hisobida to‘lab berdi”, — dedi Jahongir Boboqulov.
Izoh (0)