Ижтимоий тармоқларда Фарғона вилоят наркология диспансери ходимининг муассасада даволанаётган беморга электрошокер билан таъсир ўтказаётгани акс этган видео тарқалди. «Дарё» мухбири мазкур видео тафсилотларини ўрганиш мақсадида масъуллар билан боғланди.
«Ижтимой тармоқларда диспансеримиз билан боғлиқ видеолавҳалар тарқалди. Аввало, шуни айтиб қўймоқчимизки, айни пайтда ушбу ҳолат юзасидан Фарғона шаҳар прокуратураси томонидан терговга қадар суриштирув ҳаракатлари олиб борилмоқда. Суриштирув якунлари бўйича ҳолатга тўлиқ ойдинлик киритилиб, албатта, ҳуқуқий баҳо берилади», — деди вилоят наркология диспансери бош шифокори Бобир Ибрагимов.
Бош шифокорнинг айтишича, 2021 йил 13 март куни диспансерга маст ҳолдаги фуқаро олиб келинган.
«Ушбу фуқаро тиббиёт ходимларининг қонуний талабларига бўйсунмасдан, турли тажовузкор ҳаракатлар қилганлиги сабабли навбатчи фельдшер ёнида бўлган ‘фонарик’ билан уни тинчлантиришга ҳаракат қилган. Ушбу ҳолат видеотасвирга тушиб қолиб, ижтимоий тармоқларда бироз нотўғри талқин қилинмоқда. Видеолавҳадаги жабрланувчи шахсга нисбатан суд тиббиёт экспертизаси ўтказилди. Ушбу экспертиза хулосасига асосан фуқарода ҳеч қандай тан жароҳати аломатлари аниқланмади. Ушбу фуқаро томонидан шикоят ва эътирозлар бўлмади», — дейди Бобир Ибрагимов.
«Дарё» мухбирининг аниқлик киритишича, Фарғона шаҳар прокуратураси ҳам вилоят наркология диспансери билан боғлиқ видеолавҳалар юзасидан ўрганиш олиб борган.
Прокуратуранинг аниқлашича, 2021 йил 13 март куни соат 20:00 да Марғилон шаҳар ИИБ ХПБ профилактика инспектори Д.К. томонидан Қўштепа туманида яшовчи М.А. Марғилон шаҳрида жойлашган «Қишлоқ қурилиш банк» олдида ўта маст ҳолатда юрганлиги сабабли жиноятчиликнинг олдини олиш мақсадида вилоят наркология диспансерига олиб борилган. Диспансер навбатчи шифокори М.Қ. томонидан ҳужжатлар асосида М.А. ҳушёрлантириш учун қабул қилинган. Шу куни, тахминан, соат 22:30 да вилоят наркология диспансерида фельдшер вазифасида ишловчи Т.Ш. ёнида бўлган электрошокер мосламаси билан маст ҳолатда бўлган фуқаро М.А.га таъсир ўтказишга уринган.
Бу вақтда Фарғона шаҳар ИИО ФМБ 1-сонли ИИБ профилактика инспектори Б.Х. томонидан Фарғона шаҳар Қувасой кўчасида жойлашган «Карвонсарой» ошхонаси олдида маст ҳолатда юрган Т.М. вилоят наркология диспансерига олиб келинган. У билан бирга келган шахс томонидан юқоридаги ҳолат видеотасвирга олиниб, Telegram ҳамда YouTube’да тарқатилган.
Қайд этилишича, 2021 йил 14 март куни видео юзасидан ҳодиса жойи кўздан кечирилган ва 1 дона қора рангли электрошокер ашёвий далил тариқасида олинган.
«Терговга қадар текшириш давомида фуқаро М.А. ҳақиқатдан ҳам 2021 йил 13 март куни соат 20:00 да Марғилон шаҳрида жойлашган ‘ Қишлоқ қурилиш банк’ олдида ўта маст ҳолатда юрганлиги сабабли ИИБ ходимлари томонидан вилоят наркология диспансерига олиб борилганлигини, тахминан, соат 22:30 да фельдшер вазифасида ишловчи Ш.Т. электрошокер мосламаси билан унинг бўйин қисмига таъсир ўтказмоқчи бўлганлигини, лекин унга электрошокер мосламаси тегмагани, ИИБ ходимлари ва шифокорлар томонидан қийноққа солинмаганлиги ёки тан жароҳати етказилмаганлигини, ҳеч кимдан даъвоси йўқлигини билдирган.
Ҳолат бўйича фуқаро М.А.га судга оид тиббий экспертиза тайинланган. Шунингдек, вилоят наркология диспансерининг навбатчи шифокори М.Қ. ҳамда фельдшер Ш.Т.нинг хатти-ҳаракатлари юзасидан вилоят Соғлиқни сақлаш бошқармасига хизмат текшируви тайинланган. Ҳозирда мазкур ҳолат юзасидан шаҳар прокуратураси томонидан терговга қадар текширув ҳаракатлари олиб борилмоқда», — дейилади Фарғона шаҳар прокуратураси баёнотида.
Фарғона вилоят соғлиқни сақлаш бошқармаси ҳам ушбу вазиятга муносабат билдирди.
«Дастлабаки ўрганиш давомида аниқланишича, 2021 йил 13 март куни Т.Ш. исмли фельдшер навбатчилиги вақтида ҳудудий профилактика инспектори томонидан маст ҳолда бўлган фуқаро диспансерга олиб келинган. Фуқаро тиббий ходимлар ҳамда профилактика инспекторининг қонуний талабларини бажармасдан, ўзини ўта тажовузкор тутиб, тиббий ходимларга ташланган ҳамда диспансернинг моддий бойликларига қўпол муносабатда бўлган, эшик, стол, стул ва каравотни тепиб, синдиришга уринган. Ўз навбатида фельдшер фуқарони тинчлантириш мақсадида олдида бўлган фонарни ‘электрошокер’ тариқасида ишлатган ва маст ҳолдаги фуқарони шу тариқа тинчлантирмоқчи бўлган.
2021 йил 15 март куни ўтказилган суд-тиббий экспертиза хулосасига кўра, фуқаронинг баданида электрошокердан олинган ҳеч қандай тан жароҳати аниқланмаган.
Бундан ташқари, Фарғона шаҳар прокуратураси томонидан тайинланган техник экспертизада фельдшерга тегишли бўлган фонар умуман электрошокер вазифасини бажара олмаслиги ҳамда мазкур мослама билан фуқарога тан жароҳати етказишнинг имкони йўқлиги ўз тасдиғини топган.
Ўтказилаётган текширув якуни бўйича касб этикаси ва деонтологиясига риоя қилмагани учун фельдшерга қонунчиликда белгиланган тартибда чора кўрилишини маълум қиламиз», — дейилади вилоят соғлиқни сақлаш бошқармаси томонидан берилган маълумотда.
Мазкур воқеага муносабат билдирган вилоят ИИБ воқеа жойида бўлиб, ҳолатни кузатиб турган ИИБ ходимларининг хатти-ҳаракатига ҳуқуқий баҳо берилишини билдирган.
«Мазкур видеони шарҳлаган шахс тиббиёт ходими электрошокер билан фуқарони бир неча марта уриб, ваҳшийларча муносабатда бўлаётганлигини, аммо ўша ерда турган ИИБ ходими ҳолатга эътибор қаратмаётганлигини билдирган.
Фарғона вилоят ИИБ томонидан ўтказилган текширувга кўра, фуқаро кийимидаги шахс ИИО ходими эмас, балки наркология диспансерида қоровул бўлиб ишловчи С.Э. эканлиги аниқланган. Тиббиёт ходимининг хатти-ҳаракатлари юзасидан тегишли ҳужжатлар расмийлаштирилиб, Фарғона шаҳар прокуратураси томонидан терговга қадар текширув ҳаракатлари олиб борилмоқда. Вилоят ИИБ томонидан юқоридаги ҳолатга ИИО ходимининг алоқадорлиги юзасидан хизмат текшируви тайинланган бўлиб, ҳолатга ҳуқуқий баҳо берилади», — дейилади вилоят ИИБнинг расмий муносабатида.
Изоҳ (0)