Xitoyda COVID-19’ga qarshi qalbaki vaksina sotgan 80 dan ortiq kishi hibsga olindi

Xitoy politsiyasi 80 dan ortiq odamni hibsga olib, 3000 dozadan dori vositalarini musodara qildi. Hibsga olinganlar ushbu dorilarni koronavirusga qarshi vaksina sifatida tarqatgan, deya xabar berdi “Interfaks”.

Gumonlanuvchilar 2020-yilning sentabr oyidan beri shpritslarni oddiy fiziologik eritma bilan to‘ldirib, vaksina niqobi ostida yuqori narxda sotib kelgan.

Pekin, Shanxay va Shandun provinsiyasida qalbaki vaksina sotuvchilarning tarmog‘i aniqlangan.

Xitoyning ingliz tilida chiqadigan Global Times gazetasi mamlakatning yirik vaksina ishlab chiqaruvchi kompaniyasiga yaqin manbaga asoslanib, qalbaki mahsulot sotuvchilar dunyodagi vaksina yetishmovchiligidan foydalanib, mahsulotlarini ehtimol, chet elga ham jo‘natmoqchi bo‘lgani haqida xabar bergan.

Eslatib o’tamiz, Xitoy 2020-yilda 220 milliarddan ziyod himoya niqobini ikki yuzdan ortiq mamlakat va hududlarga eksport qilgan. Shuningdek, 2,3 milliard kombinezon va test uchun 1 milliard reaktivlar to‘plami ham eksport qilingan.

Xitoyning ayrim shaharlarida aholining Yangi yil bayramini uyda o‘tkazishi uchun pul to‘lash boshlangan. Mamlakatda bu yil bayram 12-fevraldan 27-fevralgacha davom etadi. Rasmiy ravishda xitoyliklar yetti kun — 12–18-fevral kunlari dam oladi. Ta’kidlanishicha, yangi yil bayramida xitoyliklar ko‘pincha boshqa shahardagi qarindoshlarinikiga boradi. Bu katta migratsiya oqimini yaratadi.