Ўзбекистон Евросиё иқтисодий иттифоқи (ЕОИИ) билан инвестициявий ҳамкорликни оширишга тайёр, деб хабар бермоқда Инвестициялар ва ташқи савдо вазирлиги матбуот хизмати.
Хусусан, Евросиё тараққиёт банки ва Евросиё барқарорлаштириш ва ривожлантириш жамғармаси билан ҳамкорлик истиқболлари муҳокама қилинмоқда.
Ҳамкорлик масаласи 15 март куни Ўзбекистон ҳукумати делегациясининг Россияга ташрифи доирасида бош вазир ўринбосари — инвестициялар ва ташқи савдо вазири Сардор Умрзоқовнинг Евросиё иқтисодий комиссияси (ЕОИК) раиси Михаил Мясникович ва савдо бўйича ЕОИК ҳаяти аъзоси (вазири) Андрей Слепнёв билан учрашувда муҳокама қилинган.
Томонлар, шунингдек, инвестициявий ҳамкорлик ва саноат кооперациясини кенгайтириш, тўсиқларсиз ўзаро савдо қилишга шароитлар яратиш ва минтақанинг транзит салоҳиятидан фойдаланиш самарадорлигини ошириш бўйича қўшма комплекс дастурларини ҳаётга татбиқ этишга тайёр эканлигини билдирган.
Учрашув якунида юзага келадиган барча масалаларни зудлик билан ҳал этиш мақсадида ЕОИК билан экспертлар даражасида доимий алоқалар механизмини жорий этиш бўйича келишувга эришилган.
Қайд этилишича, бу ҳам Ўзбекистон ва ЕОИИ ўртасида самарали ҳамкорликни ривожлантиришга ёрдам беради.
Эслатиб ўтамиз, Ўзбекистон 2020 йилнинг декабрида Евросиё иқтисодий иттифоқида расман кузатувчи-давлат мақомини олган. 2021 йилнинг январида Ўзбекистоннинг ЕОИИ билан ҳамкорлиги бўйича 2021 йилга оид «йўл харитаси» тасдиқланди, февраль ойида Ўзбекистоннинг Евросиё иқтисодий комиссиясидаги вакили тайинланди.
Изоҳ (0)