Наманганда куёв собиқ қайнотасини қасддан ўлдириб, сўнг жиноятини яшириш мақсадида марҳумнинг уйини ёқиб юборди. Бу ҳақда «Дарё» мухбири Азизбек Абдувалиев хабар бермоқда.
Ҳодиса 2021 йил 14 март куни Тўрақўрғон туманининг «Бордимкўл» маҳалласида содир бўлган. Муқаддам икки бор судланган, 1994 йилда туғилган Қодир Ашуралиев (исм-шарифлар шартли) собиқ турмуш ўртоғи Нодира Аҳадованинг 2,5 яшар ўғли Аминбек учун алимент талаб қилганидан ғазабланиб, ярим тунда унинг уйига бостириб боради. Якка ўзи эмас, Мингбулоқ туманида яшовчи, муқаддам судланган 37 ёшли Шуҳрат Алижоновни ҳам шерик қилиб олади.
Қодир Нодира Аҳадова билан 2017 йилда турмуш қурган, бироқ орадан бир йил ўтиб ажрашганди. Шундан сўнг Нодира алимент ундириш учун мурожаат қилади, тўлов суммаси эса воқеа рўй берган кунга қадар 15 миллион сўмга яқинлашиб қолганди.
Ашуралиев хонадонда собиқ қайнотаси, 1972 йилда туғилган Илҳом Қаюмов билан ўзаро жанжаллашади ва шериги билан унинг бош қисмига бир неча бор пичоқ билан уриб, қасддан ўлдиради. Бу пайт уйда собиқ турмуш ўртоғи ва қайнонаси бўлмаган, сумалак тадбирига чиқиб кетган эди. Хонадонда қолган собиқ қайнука, мактабнинг 10-синфида таҳсил оладиган Оқил Аҳадов жанжал овозидан уйғониб кетади.
Унинг гувоҳ бўлиб қолишидан чўчиган жиноятчилар боланинг оёқ-қўлини боғлаб, дадасига тегишли Damas автомашинасига ўтқазишади. Автомобильга хонадондан ўғирланган икки гилам ва телевизор ҳам юкланади. Шундан сўнг жиноят изларини яшириш мақсадида жасад ётган хона ва қўшни хоналарга бензин қуйиб, ёқиб юборишади. Бу жараёнда Ашуралиевнинг юзи ва икки қўли куяди.
Жиноий шериклар машинага ўтириб, ҳодиса жойидан яширинади. Ашуралиев куйган жароҳатларини кўрсатиш мақсадида туман тиббиёт марказига боради. У шифокор олдига кириб кетганида Оқилжон боғланган оёқ-қўлларини ечиб, автомашинани ҳайдаб қочади. Уйига қайтиб келиб, юз берган ҳолат ҳақида ички ишлар идорасига хабар беради.
Бундан олдинроқ Қаюмовлар оиласининг қўшниси хонадонда аланга кўкка кўтарилаётгани ҳақида туман ёнғин хавфсизлиги бўлимига хабар берган ва тонгга яқин ёнғин тўлиқ бартараф этилганди.
— Қодир Ашуралиев туман тиббиёт бирлашмаси дарвозасидан киради-ю, қўлга тушиб қолишидан чўчиб, ортга қайтади ва Республика шошилинч тиббий ёрдам илмий маркази Наманган филиалига йўл олади. Куйган жароҳатларини «далада ўт ёқиб ўтирганда олдим», деб шифокорларга тушунтирган, унда биз аллақачон унинг изига тушгандик. Ашуралиевнинг жиноий шериги, «қассоб» лақаби билан танилган Алижоновни эса уйидан топдик. Бир соатнинг нари-берисида жиноятчилар ушланди, — дейди туман ИИБ жиноят-қидирув бўлими тезкор вакили, катта лейтенант Шавкатжон Қосимов.
Ҳозирда мазкур ҳолат юзасидан туман прокуратураси томонидан жиноят иши қўзғатилиб, тергов-суриштирув ишлари олиб борилмоқда.
15 март куни Тўрақўрғондаги маданият марказида юз берган мазкур жиноят муҳокамасига бағишланган йиғилиш ҳам бўлиб ўтди. Унда вилоят ҳокими, вилоят прокурори ва вилоят ИИБ бошлиғи, профилактика инспекторлари, жамоатчилик вакиллари иштирок этди.
Изоҳ (0)