Тошкентда 16 март куни Россиянинг Shimco Group компанияси ва Словакиянинг Chirana компанияси томонидан сунъий нафас олдириш аппаратларини ишлаб чиқариш корхонаси ишга туширилди, деб хабар беради «Gazeta.uz».
Россия—Словакия—Ўзбекистон қўшма корхонаси Chirana Asia йилига 500 донагача ускуна ишлаб чиқариши мумкин. Ишлаб чиқаришнинг умумий қиймати 6 миллион долларни ташкил этади.
Shimco Group президенти Василий Шимко таъкидлашича, Тошкентда ишлаб чиқариладиган қурилмаларда турбина ўрнига мембранали компрессор ишлатилади, бу эса хизмат муддатини сезиларли даражада оширади ва вентиляторга техник хизмат кўрсатиш нархини пасайтиради.
Василий Шимконинг маълум қилишича, биринчи шундай аппарат 2020 йил май ойида Тошкент шаҳридаги 1-сонли Республика клиник касалхонасига юборилган.
Биринчи босқичда сунъий нафас олдириш аппаратлари ишлаб чиқариш учун Россия компанияси 2 миллион долларлик сармоя киритди, келажакда қўшма корхона анестезик ҳамда стоматологик ускуналар ишлаб чиқаришни ўзлаштиришни режалаштирмоқда.
Ишлаб чиқарилаётган маҳсулотларнинг деярли 80 фоизини Марказий Осиё мамлакатларига, биринчи навбатда, Афғонистонга экспорт қилиш режалаштирилган ва бундан ташқари, компания Тожикистон ва Қирғизистон билан шартномалар тузган.
Бундан аввал Тошкентдаги 77 та мактабда ўқувчилар орасида коронавирус инфекцияси аниқлангани, Зангиотадаги ковид-касалхоналарда «минглаб бўш ўринлар бор»лиги маълум қилингани ҳамда Тошкентда карантин талабларига риоя қилишнинг назорати кучайтирилиши ҳақида хабар берилганди.
Изоҳ (0)