Республика ихтисослаштирилган онкология ва радиология илмий-амалий тиббиёт маркази раҳбарияти икки ойдан буён ишламаётган чизиқли тезлатгич нур бериш ускунасини яқин кунларда тузатишга ваъда берди. Ушбу ускуна саратон касалларини даволаш учун фойдаланилади.
«Podrobno.uz»нинг ёзишича, ижтимоий тармоқларда эри саратон касаллигига чалинган Регина Нигматуллина видеомурожаати тарқалди. Унда онкология марказидаги ушбу ускуна икки ойдан буён ишламаётгани ва мунтазам бузилаётгани туфайли тумуш ўртоғининг аҳволи ўлар даражада оғирлашиши мумкинлиги айтилган. Бу ҳолат бошқа кўплаб беморларга ҳам тегишли, чунки бундай аппарат республикада ягона ҳисобланади.
Республика ихтисослаштирилган онкология ва радиология илмий-амалий тиббиёт маркази бу ҳолатга қуйидагича изоҳ берган.
2018 йилда Буюк Британия Elekta Infinity фирмасининг чизиқли тезлатгич нур бериш ускунаси ўрнатилган ва ишга туширилган. Бу бошқа ишлаб чиқарувчиларнинг ҳеч бир мосламасида ўхшаши бўлмаган техник параметрларга эга Республикадаги биринчи замонавий чизиқли тезлатгич нур бериш ускунасидир. Қурилма кўп қиррали бўлиб, ҳам стандарт даволанишни амалга ошириш, ҳам барча замонавий юқори аниқликдаги технологиялардан фойдаланиш имконини беради.
Қурилма икки йил давомида UMN Medical компанияси кафолат хизматида бўлган. Унинг кафолат муддати 2020- йил августида тугаган.
«Қурилманинг биринчи носозлиги 2020 йил сентябрь ойида юз берган (аппаратнинг «катод»и ишламай қолган). Ушбу деталь Буюк Британиядан буюртма қилиниб, етказиб берилган. UMN Medical ходимлари томонидан шартнома асосида ушбу қисм ўрнатилиб, аппарат ишга туширилган. ‘Катод’ бузилгани сабаб қурилма бир ой давомида ишламаган. Шундан сўнг у 2021 йил январь охиригача ишлади», — деб таъкидланган марказ хабарида.
Қурилма иккинчи марта ишдан чиққанидан сўнг ўша куннинг ўзида сервис маркази мутахассислари чақирилиб, «ион насоси» ва унинг электр таъминоти блоки ишдан чиққани аниқланган. Аппаратдан фойдаланиш тўхтатилган. Сервис маркази мутахассислари диагностика ишларини олиб борган ва Европадан керакли эҳтиёт қисмларига буюртма берган. Пандемия ва етказиб бериш қоидалари туфайли қурилманинг ушбу қисмлари 2021 йил февраль ойида етказиб берилган ва ўрнатилган.
Аппарат синов тариқасида ишга туширилганда, унинг «катод»и ва вакуум тизими мембранаси ишдан чиққани аниқланган. Март ойининг бошларида ушбу қисмлар Европадан етказиб бериш учун буюртма қилинган. Қурилмани таъмирлаётган компания эҳтиёт қисмлар 2021 йил март ойи охирларида етказиб берилишини айтган. Эҳтиёт қисмлари ўрнатгандан сўнг аппарат яна ишга туширилади.
«Биз ушбу аппарат иложи борича тезроқ ишга туширилишидан манфаатдормиз, чунки беморларимиз аҳволи унга боғлиқ ва биз уни тезроқ хизматга қайтариш учун барча саъй-ҳаракатларни амалга оширяпмиз», — дея таъкидланган марказ хабарида.
«Podrobno.uz»нинг қайд этишича, марказнинг баёнотига параллел равишда ушбу қурилмага хизмат кўрсатишга масъул бўлган UMN Medical директори Манвел Арутюнян томонидан берилган маълумот ижтимоий тармоқларда пайдо бўлди. Уни Telegram’даги «Город говорит» канали тарқатди.
Унинг сўзларига кўра, «қурилмадан фойдаланиш бошланганиданоқ, онкология маркази беморлар оқимини кунига 50 нафардан 90 нафаргача оширишга қарор қилган, клиника кунига 16—18 соат давомида уч сменада ишлади. Қайд этиш жоизки, МАГАТЭнинг кўрсатмасига асосан бундай турдаги қурилмага тўғри келувчи беморлар сони ҳафтасига беш кунлик иш жадвалида кунига 50 кишидан ошмаслиги керак. Шундай қилиб, тушунишимизча, қурилманинг эскириши икки баравар тез кечмоқда: 2 йил 7 ой ичида у беш йиллик нормани бажариб қўйди».
Сентябрь ойида UMN Medical ушбу марказга чизиқли тезлатгичнинг кафолатидан кейинги бир йиллик хизмат кўрсатиш учун шартнома таклиф қилган. Молиялаштириш йўқлиги сабабли келишув тузишга эришилмаган: «на Республика маркази бюджетидан, на Соғлиқни сақлаш вазирлиги бюджетидан бундай маблағлар ажратилмаган».
Манвел Арутюнян маълум қилишича, бир мунча вақтдан бери чизиқли тезлатгични таъмирлаш билан Қозоғистоннинг Medicine Equipment Service компанияси шуғулланмоқда.
«Бизга маълум бўлишича, ушбу компания тезлатгичларга хизмат кўрсатиш бўйича тажрибага эга, аммо бошқа ишлаб чиқарувчилардан. У ҳеч қачон Элеcта тезлатгичлари билан ишламаган, ишлаб чиқарувчи томонидан сертификатланган муҳандисларга эга эмас. Давлат реестри маълумотларига кўра, Medicine Equipment Service МЧЖ Ўзбекистон ҳудудида ионлаштирувчи нурланиш манбалари билан ишлаш учун лицензияга эга бўлган компаниялар рўйхатига киритилмаган. Шу сабабли ушбу компания ишлаб чиқарувчилар маълумотига кўра оригинал бўлмаган ва ишлаб чиқаришда синовдан ўтмаган эҳтиёт қисмларни қандай қилиб етказиб бераётгани тушунарсиз», — деб таъкидлаган у.
«Шу ўринда ҳақли савол туғилади — бундай ускуна билан ишлашда тажрибага эга бўлмаган компанияга мамлакатдаги саратон касаллари учун ягона бўлган замонавий тезлатгични таъмирлашга ким рухсат берди? Худо кўрсатмасин, бирор нарса юз берса, ким жавоб беради?», — дея якунлаган хабарни «Podrobno.uz».
Эслатиб ўтамиз, 2021 йилнинг февралида Республика ихтисослаштирилган онкология ва радиология илмий-амалий маркази Тошкент шаҳар филиалининг бир гуруҳ ходимлари муассасада юз бераётган салбий ҳолатларга қонуний баҳо беришни сўраб, Президентга мурожаат йўллагани тасвирланган видео кенг баҳс-мунозарага сабаб бўлганди. Видеомурожаатда марказнинг Тошкент шаҳар филиали директори бошчилигидаги бир гуруҳ шахслар томонидан коррупция ҳаракатлари очиқдан очиқ кучайиб кетгани, марказ директори ўзининг қўл остидаги ишончли шахслар орқали беморлар ва уларнинг қариндошларидан касалликни тузатиш баҳонасида турли йўллар ва воситалар билан пул талаб қилиш йўлига ўтгани айтилган.
2021 йил 2 февралида Чилонзор тумани прокуратураси томонидан ушбу марказ мансабдор шахсларига нисбатан жиноят иши қўзғатилган, ушбу жиноят иши тергови Бош прокуратура томонидан назоратга олинганди.
Изоҳ (0)