АҚШнинг Moderna компанияси ўзининг mRNA-1273 вакцинасини олти ойликдан 12 ёшгача бўлган болаларда синовини бошлади. Синов жараёнида, тахминан, АҚШ ва Канададан 6750 нафар бола қатнашиши режалаштирилган. Бу ҳақда Tengrinews хабар берди.
Тадқиқот KidCOVE, Миллий соғлиқни сақлаш институти қошидаги Миллий аллергия ва юқумли касалликлар институти (NIAID) ва АҚШ Соғлиқни сақлаш ва аҳолига хизмат кўрсатиш вазирлигининг Кенгайтирилган биотиббий тадқиқотлар ва ривожлантириш бошқармаси (BARDA) билан ҳамкорликда олиб борилмоқда.
«АҚШ ва Канададаги соғлом болаларда mRNA-1273 тадқиқотининг 2/3 босқичини бошлашдан мамнунмиз, NIAID ва BARDA’га ҳамкорлик учун миннатдорчилик билдирамиз», — деди Moderna бош директори Стефан Бансел.
Клиник текширувлар давомида икки доза вакцинанинг хавфсизлиги, таъсири, реактогенлиги ва самарадорлиги баҳоланади. Улар болаларга 28 кун фарқ билан берилади.
Биринчи босқичда икки ёшдан 12 ёшгача бўлган болалар иккита дозадан бирини (50 ёки 100 микрограмм) қабул қилади, олти ойликдан икки ёшгача бўлган болалар вакцина дозасининг учдан бирини (25, 50 ёки 100 микрограмм) қабул қилади. Кейин мутахассислар плацебо назорати остида ўтказилган тадқиқотнинг иккинчи босқичида қайси дозадан фойдаланишни аниқлаш учун оралиқ таҳлил олади. Иккинчи эмлашдан сўнг тадқиқот иштирокчилари бир йил давомида кузатув остида бўлади.
Маълумот учун, АҚШ Озиқ-овқатлар ва дорилар сифати бўйича бошқармаси (FDA) 18 декабрь куни Moderna фармацевтика компанияси томонидан ишлаб чиқарилган коронавирусга қарши вакцинани мамлакатда қўллаш учун рухсат берган эди.
Аввалроқ Гарварднинг Америка сиёсий тадқиқотлар маркази (Harvard CAPS) ва Harris Poll компаниясининг сўровномаларига кўра, АҚШ аҳолисининг деярли 41 фоизи COVID-19’га қарши эмланишни истамаслиги маълум бўлган.
Изоҳ (0)