Ўзбекистонда жисмоний шахслар февраль ойида 523 миллион долларлик чет эл валютасини сотди. Бу сўнгги 13 ойдаги энг юқори кўрсаткич, деб хабар бермоқда Spot Марказий банк ҳисоботига таяниб.
Қайд этилишича, сўнгги йилларда аҳоли айнан февраль ойида доллар айирбошламоқда, хусусан, 2020 йилда бу кўрсаткич 514 миллион долларни ташкил этган (бутун йил давомидаги энг юқори ҳажм).
Марказий банк ўз ҳисоботига ҳеч қандай изоҳ бермаган. Аммо Spot суҳбатлашган мутахассислар бу кўп жиҳатдан пул ўтказмалари билан боғлиқ деб ҳисоблайди. Йил бошида уларнинг ҳажми ҳар доим камайиб боради ва март–апрель ойларида ўсишни бошлайди (ўтган йилда савдо шериклари бўлган мамлакатларда пандемия бошлангани туфайли ушбу тренд бузилганди).
Ушбу даврда пул ўтказмалари даромаднинг асосини ташкил этадиган (бундайлар Ўзбекистонда жуда кўп) аҳоли ўтган йилнинг иккинчи ярмида жўнатилган долларни сўмга алмаштирди.
Аввалроқ Ўзбекистонга юборилаётган пул ўтказмалари оқимида ўсиш кузатилгани, энди меҳнат муҳожирлари кўпроқ маош ола бошлагани тўғрисида хабар берилганди. Марказий банк маълумотларига кўра, Ўзбекистонга 2020 йил давомида юборилган халқаро пул ўтказмалари ҳажми 6 миллиард доллардан ошган.
Изоҳ (0)