Самарқандда ҳовлисидаги 4 метрли чуқурга тушиб кетган уй бекаси қутқарилди, дея хабар бермоқда Фавқулодда вазиятлар вазирлиги.
Ҳодиса 14 март куни Самарқанд шаҳрининг Гургли кўчасида жойлашган уйларнинг бирида содир бўлган.
Таъкидланишича, бир кун олдин уй эгаси 4 метрли чуқур қазган, аммо бу чуқурнинг оғзини ёпиш чораларини кўрмаган. Шу орада боғ томон йўл олган 52 ёшли Н.Т. исмли уй бекаси чуқурни кўрмай қолиб, унга тушиб кетган.
Ҳодисага гувоҳ бўлган фуқаролар зудлик билан вилоят Фавқулодда вазиятлар бошқармасининг қутқарув гуруҳига қўнғироқ қилган. Бир неча дақиқа давом этган қутқарув жараёнлари натижасида фуқаро чуқурдан олиб чиқилган.
Аниқланишича, уй бекаси жиддий жароҳат олмаган ва шу сабабли тез тиббий ёрдам хизматига мурожаат қилинмаган.
Бундан аввал Андижонда хандақ қазиётганда тупроқ босиб қолган фуқаро, Фарғонада 12 метрлик чуқурликда қолиб кетган ишчи ҳамда Тошкент вилоятида тупроқ босиб қолган қурилиш ишчиси қутқарилгани ҳақида хабар берилганди.
Изоҳ (0)