Тошкент шаҳар Яккасарой туманида яшовчи аёл навоийлик 22 ёшли қизни Туркияга сотиб юборгани аниқланди, дея хабар бермоқда «Халқ сўзи online».
Навоий вилояти ИИБ Терроризм ва экстримизмга қарши курашиш бошқармаси ходимлари томонидан олиб борилган суриштирув ҳаракатлари натижасида Тошкент шаҳар Яккасарой туманида яшовчи 1969 йилда туғилган фуқаро Қ.М. 1998 йилда туғилган навоийлик М.Ғ.нинг ишончига кириб, Тошкент шаҳридаги савдо дўконларидан бирида ишлатишни ваъда бериб, олиб кетгани аниқланган.
Бироқ орадан ҳеч қанча вақт ўтмасдан Қ.М. 22 ёшли қизни 2020 йилнинг октябрида Тошкент халқаро аэропорти орқали Туркияга олиб чиқиб кетади. Кейинроқ Қ.М. қизни Туркияда яшовчи фуқароларга сотиб юборади.
Мазкур ҳолат юзасидан Навоий вилояти ИИБ Тергов бўлими томонидан Жиноят кодексининг 135-моддаси 2-қисми «з» банди (жабрланувчини Ўзбекистон давлат чегарасидан олиб ўтган ҳолда ёки уни чет элда қонунга хилоф равишда ушлаб турган ҳолда одам савдоси билан шуғулланиш) билан жиноят иши қўзғатилган.
Ҳозирда тергов ҳаракатлари олиб борилмоқда.
Бундан аввал Навоийда бошпанасиз қизга ўз уйидан жой бериб, уни фоҳишаликка мажбурлаган аёл ушлангани, Жиззахда 3 нафар аёлни фоҳишалик қилиш учун Туркияга жўнатаётган 21 ёшли йигит қўлга олингани ҳамда Наманганда бир ёшга тўлмаган ўғлини 4700 долларга сотишга уринган аёл қўлга олингани ҳақида хабар берилганди.
Изоҳ (0)