O‘zbekistonda xorijdan yuborilayotgan pul o‘tkazmalari ko‘proq qaysi viloyat hisobiga to‘g‘ri kelishi ma’lum bo‘ldi

Davlat statistika qo‘mitasi O‘zbekiston aholisining 2020-yil yanvar—dekabr oylari bo‘yicha umumiy daromadlari to‘g‘risidagi ma’lumotlar bilan bo‘lishdi. Unga ko‘ra, 2020-yilda aholi jon boshiga umumiy daromad 11,7 million so‘mni tashkil etgan.

Daromadlar turli manbalardan bo‘lib, ular orasida xorijdan yuborilgan pul o‘tkazmalari ham bor.

Qayd etilishicha, 2020-yilda aholining umumiy daromadlari tarkibida respublika tashqarisidan kelib tushgan pul o‘tkazmalarining eng yuqori ulushi Samarqand (23,1 foiz) va Xorazm (22,7 foiz) viloyatlarida kuzatilgan. Uning ortidan Surxondaryo (20,1 foiz) va Andijon (20 foiz) viloyatlari o‘rin olgan.

Namangan viloyatida esa ushbu ko‘rsatkich 16,9 foizga teng. Qashqadaryoda 16,7 foiz, Farg‘onada 16,3 foiz, Buxoroda 15,8 foiz, Qoraqalpog‘iston Respublikasida esa 18,6 foizga teng.

Pul o‘tkazmalarining eng kam ulushi Navoiy (4,4 foiz), Toshkent (5,7 foiz) va Jizzax (7,2 foiz) viloyatlarida qayd etilgan.

Avvalroq O‘zbekistonga yuborilayotgan pul o‘tkazmalari oqimida o‘sish kuzatilgani, endi mehnat muhojirlari ko‘proq maosh ola boshlagani to‘g‘risida xabar berilgandi. Markaziy bank ma’lumotlariga ko‘ra, O‘zbekistonga 2020-yil davomida yuborilgan xalqaro pul o‘tkazmalari hajmi 6 milliard dollardan oshgan.